Miyanê Licey kurmancî xeberî danê. Henî dewey Licey kurmancî, henî jî bi kirmanckî (zazakî).
Sere muhîm niyo, kamco sere bî, yan jî çende serî verî bî... Ma vacin zemanê verî bî. Di enî zemanê verî de, Licey de dewican çî xo (zey hengure, rûn û çî bînî) berdêne miyanê Licey de rotêne. La liceyican bi dewican nêkerdêne. Çi çax firsend vînayne dayne dewican ro. A joy ser dewicî tersayne şorê miyanê Licey. La reyna jî mecbûrî bî û şîne. Zehfê dewican jî roja yene şîne bazarê Hênî (çimkî her roja yene Hêne de bazar viraziyayne) û çî xo eyca rotêne. Miyanê Hênî bi zazakî xeberî dayne.
Welhasil.
Dema dewicêke miyanê Licey de tenî mendê ne, ciwanî dewrê ê de kom bîne û dayne pero. Hetêkero dayne pero, heto bîn ro vatêne "Gundî ye, lêxin". Ger extiyarê ke ewca ro bihameyne hetêkero vatê "Lênexin, gune ye" heto bîn ro jî îşaret kerdêne ke perodê. A joy ser qet dewican û Liceyicanê merkezî ro jobînan nêkerdê ne.
Merdimê miyanê Licey zey tebeqey jorîn, dewicî zey tebeqey jêrîn hameyne vînayiş.
Serî derbas bî, zeman bedeliya, hêdî hêdî no ferq miyan ra hame wedartişî. Û wexto serey 90 qediyay, seranê 2000'î dest pê kerd hendî "dewicî" jî wayîrê vatişî bî. Hendî ferq miyanê "dewican" û "bajariyan" de nêmend bî. Yê dewican ra jo jî Harun Erkuş o.
Erkuş serey 1973 de dewey Licey Dêrxuste de hamey dinya. Jiyaney ê ewca derbas biya. Serey 1993-94 de zey zehf merdiman mecbûr mendo Licey ra koç bikero û serey 2002'yan de reyna geyraw a. Erkoş di serey 2008 de kewto miyanê rêveberî Rêxistiney HADEP'a Licey. Di seranê 2010-2014'inan de 3 demî Serokatî Rêxistiney Licey kerdo û di weçînayişê serey 2014'inan de ew û Rêzan Zugurlu zey Hemşaredarê Licey hamey weçînayişî.
Di serey 2015 û 2016 de, heta rojo eyroyîn roj bi roj siyasetmedarê kurdî yenê girotişî û dewletey Tirkiya yînan hepis kena. Hemşaredarê Licey Harun Erkuş jî hame tepişnayiş û ew kerd heps (02.08.2015).
Erkuş û 20 hemşaredarê bînî yê DBP'î hema jî hepis deyê.
Ma yê dewicî, dewic Erkuşî rê û heme hemşaredarê hepisdeyê silamanê xo şirawenê.
Hendî Licey de vatişê "Gundî ye, lêxin" çiniyo, "gundî" jî beno şaredar, "bajarî" jî. La dewlete nêverdena yê şaredarî jî bikerê û yînan hepis kena.
Zeman derbas beno, serî şinê. Zeman dermanê heme çiyo. Ma hêvî bikerê go zeman dermanêke baş bido ma jî.
.jpg)
