Diyarname
Kurtefîlmê bi navê "Bêdengî" reaksiyoneke li hemberî şer e û di navenda fîlm de Dayikên Şemiyê hene.

"Bêdengî" li ser çîroka ciwanekî ku li bajarên kurdan leşkeriya xwe kiriye û rasthatina wî ya li Dayikên Şemiyê hatiye kişandin. Fîlmê ku di sê rojan de hatiye kişandine serlîstikvaniya wê de Îlker Kizmaz û Saadet Çaçan lîstiye ku Çaçan di heman demê de endameke Dayikên Şemiyê ye.

Derhêner Aziz Çapkurt li ser fîlm wisa dibêje: "Fîlm li ser bêbejinkariya şerê 30 salên dawî ye. Bi sed hezaran ciwan li rojhilat di nav vî şerî de leşkeriyê dikin û paşê vedigerin ma û jiyana xwe didomînin. Dixwazin travmayeke wisa dehf bidin binhişînê û bidin ji bîr kirin. Lê mesele wisa ne hêsan e. 'Bêdengî' navê xwe hem ji bêdengiya li hemberî vî şerî û hem jî ji bi awayekî bêdeng rûniştina Dayikên Şemiyê digire. Şer êşê dide her kesî. Êşê didi her kesê bi wijdan û bi ehlaq."

Fîlmê ku îsal li Cannesê, Hamburê û li Amedê di çarçoveya festîvalan de hat nîşandayîn, di di Festîvala Kurtefîlman a Welatên Behra Spî de di beşa Pêşbaziya Navneteweyî de wê bê nîşandayîn û bikeve pêşbaziyê. Her wiha wê li 17'emîn Festîvala Kozaya Zêrîn a Edeneyê de jî bê nîşandayîn.

Kunyeya kurtefîlm:
Nav: Bêdengî
Senaryo /Derhêner: Aziz Çapkurt
Dem: 14 dk
Format: HD
Sala Kişandinê: 2010
Lîstikvan: İlker Kizmaz, Saadet Çaçan, Firat Aksan, Musa Karagoz, Mehmet Hadi Sumer, Hêvîdar Bakir

Aziz Çapkurt kî ye?
Aziz Çapkurt di sala 1981'ê de li Qersê hatiye dinê. Wî dibistana seretayî û lîse li wir xwendiye. Paşê di hin rêzefîlmên TV'yan de asîstaniya rejiyê kiriye. Ew ji sala 2007'an ve di Kolektîfa Sînema ya Mezopotamyayê de dixebite. Çapkurt heta niha di belgefîlmê "Şewaxan" de wekî birêvebirê sazkirinê û asîstaniya vesazkirinê, di belgefîlmê "Seyîd" de berpirsiyariya deng, di fîlmê Bahozê de jî karê cîgiriya derhêner girtiye ser milê xwe. Bêdengî yekemîn kurtefîlmê Çapkurt e.