Diyarname
Kovara çar mehî ya bi navê “Çirûsk” hejmara xwe ya çaran pêşkêş kir. Bi vê hejmarê kovar kete sala xwe ya diduyan.

Kovara Çirûskê ji aliyê Weşanên Belkî ve tê derxistin. Kovara ku ji çar mehan carekê derdikeve digel nivîsên wêjeyî, cih dide nivîsên li ser ramanê jî. Kovar bi vê hejmara xwe saleke li dû xwe hişt û ket sala xwe ya diduyan. Li ser sala nû ya kovarê edîtoriya kovarê wisa gotiye, “Piştî salekê, jêsarbûn li aliyekî, em hîn nuh lê germ dibin. Lê heger mirov li xwe mikur were, kovargerî an jî derxistina xebatên peryodîk ligel fêde û kêfa xwe ya pirr, karekî pirr zor û zahmet e jî. (...) Heger hûn jî, hewcedariya we bi êgir hebe bi vê ‘Çirûsk’ê agirê xwe vêxin, lê na hûn ji seqema xwe memnûn bin, berî babidin; lê hûn biqefilin an jî biqerisin ji xwe pê ve weke sûcdar li tu kesî negerin, ew jî bi şertê ku di canê we de hîn qudûmê lêgerînê mabe..”

Çirûskê di serê salê de wekî diyarî pirtûkekê bi kovarê re dabû diyar kiriye ku dê vê sersalê jî pirtûkeke bi kovarê re pêşkêşî xwendevanên xwe bike. Yek ji taybetiyên kovara Çirûskê jî ew e ku nivîsên di kovarê de li gor alfabetîkbûna sernivîsên nivîsên di kovarê de bi cih dike.

Di vê hejmara kovarê de Îbrahîm Seydo Aydogan bi navê “Avakirina lehengan û tevna vegotinê di romanên Mehmet Uzun” de nivîseke li ser romanên wî, karakterên romanê, zimanê romanên wî, teknîka vegotinê û hwd nivîseke nivîsandiye.
Ji nivîsên kovarê Nîzamettîn Elçî di nivîsa “Erebê Şemo û yekem romana kurdî ‘Şivanê Kurmanca’” li ser Erebê Şemo û romana wî sekiniye. Digel helbest, çîrok û nivîsên di kovarê de, kovarê hevpeyvîna u bi hunermend Xelîl Xemgîn re kiriye jî pêşkêşî xwendevanan kiriye.
Di kovarê de helbest, çîrok û nivîsên Dawud Rêbiwar, Şengul Ogur, Ferzan Şêr, Janez Sar, Sadedîn Çira, Rojîn Xewn, Serhad B. Rênas, Rênas Jiyan, Dijwar Ûskan, Robîn Şerna, Welat Dilken, Ronî War, Bahoz Baran, Ahmet Temiz, Kejo Bajar, Yeqîn H., Memê Şivan, Hamît Babat, J.K., Şivan Ar, Kawa Nemir, Feratê Dengizî, Şevger Çiya, Hesenê Metê, Hisên Dûman, Fewzî Bîlge û Yaşar Eroglu hatine weşandin.