Diyarname
Bi beşdariya gelek edebdost û wêjehezên kurd, roja 2'yê vê mehê li bajarê Bonna Almanyayê Festîvala Helbesta Kurdî li dar ket.

Festîval saet dora 2'yan dest pê kir û helbestavanan yek li pê yekî rabûn ser dikê û helbestên xwe xwendin.
Festîvala ku ji aliyê Weqfa Şivan Perwer û Komeleya Xwendekarên Kurd ên li Almanyayê RAMAN’ê ve hate li dar xistin, helbestvanên kurd ên wekî Arşêvê Oskan, Aser Osîê, Cankurd, Dr Ebdil Mecîd Şêxo, Ebdilrehman Efîfê, Dilyar Dêrikî, Husên Mê Hebeşê, Jan Dost, Dr Kamiran Bêkes, Keça Kurd, Kawa Şêxî, Mizgîn Hesko, Mihemed Îsmaîl, Nezîr Palo, Nedîm Yûsiv, Serhan Îsa, Selîm Biçûk, Xebat Şakirê, Xunav, Zîlan Dêbo hatibûn vexwendin.
Her wiha ji Bakur Mehmet Tanrikulu, ji Rojhilat Hesen Îrandost, Başûr jî Edîb Çelkî wekî mêvanên rûmetê beşdarî festîvalê bûn û wan jî helbestên xwe xwendin.
Di nav xwendina helbestan re jî hunermend Zubeyr Salih stranên xwe pêşkêşî mêvanan kir.
Hunermendê dengxweş Rêkêş jî bi çend stranên Hesenê Cizîrî salon germ kir û beşdar coşandin.

Her wiha yek ji dîmenên balkêş jî xwendina helbestê ji aliyê keçika kurd Mey Jan Dost a heşt salî bû. Meya heşt salî bi xwendina helbesteke kurdî ji nivîsînên Şivan Perwer guhdar geş kir.

Şahiya helbestxwendinê heta nêzîka heştê êvarê dom kir. Di festîvalê de hin xelatên sembolîk jî li hinek helbestavan hate belavkirin. Ji nav wan Ebdul Mecîd Şêxo, Hesen Îrandost û hinin din.
Di nav mêvanên festîvalê de keça Cegerxwîn Rojîn jî hebû.
Di festîvalê de yek ji tiştê balkêş jî ew bû ku ev yekem car e di festîvaleke wêjeyî de gelek jin jî amade dibin.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.