HOGIR EBDO

AMÛDÊ – Hevseroka Kantona Cizîrê Hediye Yusif ku di nava Şandeya Rêveberiya Xweser a çavdêriya hilbijartinan de cîh digire got: “Me bi xwe serdana navendên hilbijartinan kir û dît ku gelê me bi xwe dengê xwe bikarî tîne û nûnerê xwe diyar dike. Her çiqasî êrîşên hebin jî em di avakirina civakeke demokratîk de bi israr in.”

Rêveberiya Xweseriya Demokratîk a herêma cizîrê ji bo şopandina xebatên hilbijartinên meclisên şaredariyan ên herêmê ku îro saet di 08.00’an de destpê kirin 3 şande ava kirin. Erka şandeyan ew e ku serdana navendên hilbijartinan bikin û xebatên dengdayînê ji nêz ve bişopînin.

Şandeya yekemîn a Rêveberiya Xweseriya Demokratîk ji Hevseroka Herêma Cizîrê Hediye Yûsuf, Serokê Desteya Parastinê Ebdulkerîm Saruxan, Serokê Desteya Karê Derve Ebdulkerîm Umer, Seroka Desteya Darayî (maliyê) Remziye Mihemed, Serokê Desteya Karê Hundirîn Kenan Berekat, herdu cîgirên Hevseroktiya Herêmê Efram û Xedîce Îbrahîm, Berpirsyara Buroya Peywendiyên TEV-DEM’ê Çinar Salih, Serokê Desteya Karûbarên Şehîdan Rêzan Gulo, her wiha nûnerên meclisên gel ên Dêrik û Girkê Legê pêk dihat. Ev şande çavdêrî li xebatên hilbijartinên bajarên Dêrik, Çilaxa, Girkê Legê, Tirbespiyê, Qamişlo û Amûdê kir, serdana navendên dengdayînê bû û makanîzmeya hilbijartinan bi xwe şopand.

Şandeya duyemîn ji Hevserokê Meclisa Zagonsaz Hekem Xelo, Cîgirê Serokê Meclisa Rêveber Hisên El-Ezam û hin serokên desteyên herêmê pêk tê. Ev şande xebatên hilbijartinan li aliyê Hesekê dişopîne. Ji bo şopandina xebatên hilbijartinan li bajarên Dirbêsiyê û Serêkaniyê şandeya ji Serokê Meclisa Rêveber û hin alîkarên din pêk tê di nava tevgerê de ye û serdana navendên hilbijartinan dike.

Ji bo nirxandina serdanên ku şandeyên Rêveberiya Xweser li seranserî herêmê pêk anîn, Hevseroka Herêma Cizîrê ji ANHA’yê re axivî.

Hediye Yûsuf got: “Di destpêkê de wekî rayedarên Rêveberiya Xweseriya Demokratîk her yek ji me bi xwe li bajarê xwe çû ser sindoqên hilbijartinan û dengê xwe bikar anî. Şandeya ku me avakiriye serdana gelek navendên hilbijartinan ên herêma Cizîrê kir. Li Dêrikê me serdana du navendan, li Girkê Legê navend, li Çilaxa navendek, li Qamişlo navendek û li Amûdê navendek kir û makanîzmeya dengdayîna welatiyan bi çavên xwe dît û şopand. Hevalên me yên li Hesekê, Dirbêsiyê, Serêkaniyê jî bi xwe çûn serdana navendan kirin û çavdêrî li rewşê kirin. Li gorî ku me şopand, hilbijartin bi awayekî pir baş û demokratîk derbas dibin, li hemû navendên hilbijartinan qerebalix hebû û welatiyên li ber wan kom bûbûn. Gelê me êdî rastiya çawaniya dengdayînê nas kiriye û dikare bi hêsanî dengê xwe bide û nûnerên xwe derbixe. Ev yek jî li gel ji cihê rêzdariyê ye.”

Hediye Yûsuf axaftinên ku berî niha li kolanan derbarê hilbijartinan bi bîra kesên ku belav dikirin, xist û got: “Berî hilbijartinan gelek aliyan digotin ku kes naçe ser sindoqan û dengê xwe bikar nayîne, lê di rastiyê de tişta ku îro li herêma Cizîrê pêk hat û hilbijartinên demokratîk ên bi qerebalix ku hatin kirin û çavdêriya ku me kir, ev yek berovajî pênase kir û îsbat kir ku gelê herêmê dikare nûnerê xwe diyar bike.”

Yûsuf bal kişand ser hejmarên zêde yên hilbijaran û wiha anî ziman: “Li ber navendên hilbijartinan welatiyên ji hemû pêkhateyên kurd, ereb û suryanî kom bûne, dibe ku dema hatiye diyarkirin (20.00) têrê neke ku hemû welatî tê bigihêjin, ji ber vê jî eger Komîseriya Bilind a Hilbijartinan erê bike em ê bixwazin ku li hin deveran dem were dirêjkirin.”

Hediye Yûsuf got: "Li hin deverên herêma me şerên pir dijwar tên jiyîn, ji ber vê jî li hin cihan hilbijartin hatin paşdexistin, lê li piraniya bajarên herêmê hilbijartin bi awayekî zelal û demokratîk pêk tên. Her çiqasî em di nava şer de bin, çiqasî êrîş werin ser me, em ê him parastina xwe bikin  û sîstema civaka xwe ava bikin. Em di avakirina civakeke demokratîk de bi israr in û bila ev bibe name ji bo hemû aliyên xêrnexwazên me. Gelê me jî him di şer û him jî di pêngava avakirina sîstema demokratîk de bi me re ye.”

Hevseroka Herêma Cizîrê Hediye Yûsuf encama dengdayînê ku dê were derxistin û kesên ku wê bibin endamên meclisên şaredariyan li tevahiya welatiyên herêma Cizîrê pîroz kirin û destnîşan kir ku encama derkeve encama vîna wan a azad e.