Kerkûk

Ji serê sibê de hêzên Heşdî Şebî ligel leşkerên Iraqê êrîşê Kerkûkê kirin, pêşmergeyên li Kerkûkê ku piranî yên YNK'ê bûn bêyî şer bi paş ve vekişiyan. Hinek hêzên HPG'ê ku li Kerkûkê bûn ber xwe dan lê li gor agahiyên heta piştî nîvro û ber êvarkî encam neguherî: Kerkûk bi temamî ket destê Heşdî Şebî û leşkerên Iraqê. 

Hêzên Heşdî Şabî li avahiyên fermî ala xwe daliqandin. Bi ketina hêzên Heşdî Şebî ya Kerkûkê re, beşek mezin yê gel bajêr terk kirin û ber bi Silêmanî û Hewlêrê ve ketin rê. Hê jî gelek mirov li ser rê ne û dixwazin xwe bigihînin cihên bi ewle.

Li gorî agahiyên ji çavkaniyên herêmî, hat zanîn ku hinek komên ku li dijî dagirkirina Heşdî Şabî li bajêr li ber xwe didin di herêmekê de asê mane û ew jî hewl didin ji bajêr derbikevin.

Serokwezîrê Iraqê Ebadî ferman da ala Iraqê li herêmên Kurdistanê bê bilindkirin.

Hêzên hatin Kerkûk dagir kirin hemû sembolên aîdê kurdan ji holê radikin. Bi kepçeyan tabelayan jî dişkînin û dadixin.

Leşkerên Iraqê ketin avahiya Waliyê Kerkûkê Necmedîn Kerîm, ew der dagir kirin û fotoyên xwe belav kirin.