Diyarname

2'yemîn Festîvala Dostaniyê ya Kurtefîlman di navbera 13-15'ê mehê de li dar ket. Di sê rojên festîvalê de kurtefîlm li Beyoglu Fîtaş, Salt Galata û Navenda Çanda Zeytînbûrnû hatine nîşandayîn. Di vê çarçoveyê de 50 kurtefîlm û 4 fîlmên metrajdirêj hatin nîşandayîn. 

Di festîvalê de beşa pêşbaziya kurtefîlman jî hebû û êvara 15'ê mehê kurtefîlmên bi ser ketin hatin xelatkirin.

Festîval îsal ji bo bîranîna hozanê tirk Aşiq Veysel hat lidarxistin. Merasima xelatdayînê li Grand Perayê li dar ket. Di şeva ku pêşmêşvaniya wê Irmak Ornek û mert Yavucan kir de dîrektorê festîvalê Faysal Soysal axivî. 

Di şevê de "Xelata Rûmetê ya Dostaniyê" dan lîstikvan Gulsen Tuncer û edîtorê fîlman Mevlut Koçak. Xelata Dostanî ya Kizilayê jî dan fîlmê "This Side, Other Side" ku ji Îranê beşdar bûbû.

Juriya festîvalê di bin serokatiya derhêner Reis Çelik re ji lîstikvan Feyyaz Duman, derhêner Vuslat Saraçoglu, derhêner Nima Javidi Ado Hasanović pêk dihat. Juriya di encama nirxandinê de fîlmên serketî eşkere kirin.

Xelata "Piştgiriya Teknîkê ya 15 Hezar TL'yî" dan derhênerê kurd Yilmaz Ozdil. Ozdil kurtedemek berê kurtefîlmê bi navê "Barê Giran" kişandibû.

Di beşa pêşbaziyê de kurtefîlmê derhênerê kurd Tahsin Ozmen ê bi navê "Pantor" bi ser ket. Ozmen 20 hezar TL wekî xelat girt.

Xelata duyemînî ku beramberî 10 hezar TL'yî ye jî dan fîlmê "Piece Cemetery 85" ku fîlmekî derhênerê îranî Shahram Maslakhi ye. Xelata sêyemînî ku beramberî 5 hezar TL'yî ye jÎ dan fîlmê Onur Yagiz "Toprak".

Her wiha ji îranê fîlmê Vahid Alvandifar, ji Çînê fîlmê Cheng Chao "Angel's Mirror" bi xelata mansiyonê hatin xelatkirin.
Festîvala Dostaniyê ya Kurtefîlman ku par dest pê kir îsal duyemîn car li dar ket. Îsal di nav saziyên piştgir de Wezareta Ciwan û Sporê û Wezareta Çandê ya Tirkiyeyê, Kiziliya Tirk, Şaredariyên Beyoglu û Zeytînbûrnû, TRT hebûn.