Batman
Cîgirê Serokê Giştî yê BDP’ê û parlementerê Êlihê Bengî Yildiz, da zanîn ku, ew amadekiriya çêkirina formula çareseriya pirsgirêka kurd dikin û ev lê zêde kir: “Di nava vê sîstemê de kurd li Kurdistanê, di Kurdistana Xweser de wê zimanê wan wekî zimanê yekemîn bê bikaranîn. Yekemîn zimanê wan ê fermî wê kurdî be, zimanê wan yê duwemîn jî wê tirkî be”

Tevgera Ziman û Perwerdehiya Kurdî (TZPKurdî) ku kampanyaya perwerdeya zimanê kurdî dabû destpêkirin û di vê kampanyayê de 4 hezar îmze hatibûn komkirin, piştî ku ew îmze dan Midûriyeta Perwerdehî ya Neteweyî, Cîgirê Serokê Koma BDP’ê û Parlementerê Êlihê Bengî Yildiz daxuyaniyek da û diyar kir ku, wan ji bo çareseriya pirsgirêka kurdan formulek amade kirine.

LI KURDISTANÊ ZIMANÊ YEKEM KURDIYE

Yildiz da diyar kirin ku formulasyona wan “Tirkiyeyek Demokrat, Kurdistana Xweser” Yildiz wiha axivî: “Tevgera me, têkoşîna me ji bo çareserkirina pirsgirêka kurd formulasyona ku pêşniyar kirî ev e; Tirkiyeyekî Demokratîk, Kurdistana Xweser û tevahiya Tirkiyê belavî herêmên xweser bibin. Rayeyên Rêveberiya Navendî di rêjeyek mezin de belavî herêmên xweser bibin. Şêweyek dê rêveberiya ku gotin û biryar bikevin destê gel û herêman. Di vê sîstemê de jî kurd li Kurdistanê, di Kurdistana Xweser de zimanê xwe wekî zimanê yekemîn wê bi kar bînin.”

ZIMANÊ DUWEMÎN WÊ TIRKÎ BE

Yildiz gotînên xwe wiha berdewam kir; “Zimanê yekemîn wê kurdî be, zimanê duyemîn jî wê tirkî be. Yanî wê hem kurdî hem jî tirkî fêr bibin. Pêwîst e em vê bi vî awayî bipejîrînîn. Rast e li tevahiya Tirkiyeyê zimanê fermî tirkî ye lê li gorî me pêwîst e zimanê kurdî jî wekî zimanê duyemîn bê fêr kirin. Ev sîstem pêwîstiya erdnîgariya kurd neke cihê helandinê û dest ji vê siyasetê berde. Waliyê wê kurdî nizane, qeymeqam nizane, emniyeta wê nizane, mamostayê wê nizane û hûn dibêjîn ‘emê we bi rê ve bibin’. Ewên ku zimanê vî gelî nizanibin, ew bi pirsgirêkên vî gelî jî tênagihên. Ji xwe êdî daxwazek wekî zimanê zikmakî rewa nikarin paş de bidin û ji nedîtî ve bên.”

4 HEZAR DAXWAZNAME HATIN DAYÎN

Yildiz got ku, kurd bi awayek pir zelal daxwaza perwerdeya bi zimanê xwe dikin. Yildiz got: “Îro raya giştî ya Tirkiyeyê, rewşenbîrên wê vê pirsgirêkê nîqaş dikin û didin diyarkirin ku perwerdeya bi zimanê zikmakî daxwazek rewa ye û hiqûqî ye. Kurdan jî bi destpêkirina dibistanan re zarokên xwe neşandin dibistanan. Her wiha bi vî awayî berdewam kirin. Îro jî hevalên me 4 hezar daxwazname dan midûriyeta perwerdehiya neteweyî. Kurd dixwazin perwerdeya bi zimanê xwe bibînin. Emê daxwaznameyên xwe bi şînin meqamên fermî."