Diyarname
Nivîskar û helbestvan Hemîd ji ber axaftina xwe ya di Newroza Amedê de bi 2 sal û 6 meh cezaya hepsê hat cezakirin.

Di encama binçavkirina siyasetmedar, nivîskar û hemwelatiyên din ên kurd de nivîskar û helbestvan Hemîd Dilbihar jî li Wanê hatibû binçavkirin û girtin. Dilbihar ku ji bo rojnameya Azadiya Welat nivîs dinivîsand ji 13'yê reşemiya 2010'an ve girtî ye. Dilbihar ku ew jî bi hinceta "Endamê KCK'êG" ye dihat sûcdar kirin, niha li Amedê, 5'emîn Dadgeha Cezaya Giran a amedê ji ber axaftina wî ya di Newrozê de ku dadgehê wekî "propagandaya rêxistinê" bi nav kir 2 sal û 6 meh cezaya girtinê lê birî.

Parêzerê Dilbihar, Cemal Demîr got, ew ê li dijî vê biryarê îtirazê bikin.

Dilbihar hê ji ber doza KCK’ê li Girtîgeha Tîpa H ya Erzeromê dei girtî ye.

Hemîd Dilbihar kî ye?

Nivîskar û helbestvan Hemîd Dilbihar di sala 1976’an de li Culemêrgê hatiye dinê. Wî Li Zanîngeha Yuzuncu Yila Wanê, di Zankoya Perwerdehî de Beşa Dîrokê xwendiye. Heta niha nivîsên wî li gelek cihan hatine weşandin. Wî digel nivîskarî di nav TZPKurdî de jî xebata ji bo kurdî dikir.
Heta ev pirtûkên Dilbihar ên helbestan hatine weşandin:
- Ji evîna te dilê min bû jîngeha evînê
-  Ji evîna te ez bûm jînperest
- Ezîzam
- Piştî tu çûyî