Diyarname

Îro maçên pêşî yên çarîk fînalê hatin lîstin. Di encamên de tîma neteweyî ya Spanyayê bi penaltiyan, tîma Îtalyayê jî bi serketina 2-1'ê derket nîv fînalê.

Spanya bi penaltiyan bi ser ket

Maça pêşî di navbera Spanya û Swîsreyê de bû. Maç li Stada Saint Petersburga Rusyayê hat lîstin. Hê di deqîqeya 8'an de ji Spanyayê Jordi Alba şûtek kişand kelehê, gog li Zakaria yê swîsreyê ket û Spanya bi 1-0 derket pêş. Swîsreyê di deqîqeya 68'an de bi Shakiri bersiv da: 1-1.

Di deqîqeya 77'an de ji Swîsreyê Freuler qerta sor dît û deqîqeyên mayî Swîsreyê bi 10 kesan lîst. Di 90 deqe û paşê di 30 deqîqeyên zêdek de encam neguherî û maç derbasî lêdana penaltiyan bû. Di penaltiyan de Spanyayê bi 4-2 serketin bi dest xist û derbasî nîv fînalê bû.

Îtalyayê Belçîka şand mal

Maça din hê balkêştir bû ji ber ku her du tîm jî di nav favoriyên tûrnûvayê de bûn: Belçîka û îtalya.

Maç li Munih Arenaya ya li Almanyayê hat lîstin û Îtalya bi 2-1 bi ser ket.

Îtalyanan di deqîqeya 31'ê de bi gola Barella derket pêş: 1-0, Di deqîqeya 44'an de Insigne ji derveyê sehaya pêş kelehê şûtek mikemel şand, tiştê ku Courtois bike nîn bû: 2-0.

Berî nîveka yekemîn bi dawî bibe Belçîkayê penaltiyeke bi dest xist. Lukaku bi penaltiyê ferq daxist yekê, lê vê yekê têra Belçîkayê nekir. Îtalya bi vê encamê derket nîv fînalê û Belçîka vegeriya mal.

Di encama maçan de Spanya û Îtalya di nîv fînalê de bûn reqîbên hev. Maç dê 6'ê mehê saet 22'yan e bê lîstin.

Sibê du maç hene

Du maçên din ên çarîk fînalê jî 3'yê mehê têne lîstin. Çek û Danîmarka saet 19'an de, Ûkrayna û Îngilistan saet 22'yan de dê bilîzin.