Diyarname

Romana bi navê "Şikestî" romana nivîskar Receb Dildar e ku ji Weşanxaneya Dara derketiye. Nivîskar xwendevanan dibe sedsala 20'î, dibe Herêma Xerzan...

Nivîskar Receb Dildar piştî çîrok, helbest û wergerê ev duyemîn romana wî ye ku derdikeve. Dildar, berî vê "Leqat" (2018) derxistibû.

Romana "Şikestî" payîza 2021'ê de derketiye. Nivîskar berê xwendevanan dide Deşta Bişêriyê: "Deşta Bişêriyê, di meha nîsanê de, xwe wek bûkeke li ser hepsê dixemilîne. Gava, bayekî sivik dilive, ceh û genim hêdî hêdî pêl didin. Di nav zeviyan de, kulîlkên reng bi reng, bi şînahiya ceh û genim re dikevin nava govendeke bêhempa. Temaşekirina wî dîmenî, hemû derd û kulên dinyayê dide jibîrkirin." Erê dîmen ev e, lê bûyer her wiha xweş naçe. Bûyerên bi êş hene di romanê de. Bûyera êşa gelê wê derê, çîroka Emînê Perîxanê, kuştina însanan, qîrîna Dêra Qîre, êşa Deşta Bişiriyê jî bilind dibe.

Romana ku çapa wê ya yekemîn di rezbera (îlon) 2021'ê de ji Weşanxaneya Dara derketiye, ji 235 rûpelan pêk tê.

Receb Dildar kî ye?

Nivîskar Receb Dildar di sala 1958'an de li Amedê hatiye dinê. Li Kirşehîrê dibistana mamostetî xwendiye. Li Amedê bi qasî şeş salan mamostetî kiriye û paşê ji ber fikrên xwe hatiye girtin, çar salan li Zindana Amedê girtî maye.

Pirtûkên wî ev in:

- Kewê Canê, 2003, Helbest

- Şikefta Xwekuştinê, 2008, Çîrok

- Li dû xezalekê, 2012, Çîrok

- Kitana spî, 2015, Çîrok

- Dojek, 2019, Çîrok

- Leqat, 2018, Roman

- Şikestî, 2021, Roman

- Dewran, Sayit Alp, Werger Receb Dildar, 2005

- Madonnaya Bi Mantoyê Kurk, Sabahattin Ali, Werger Receb Dildar, 2019

- Şikestî / Receb Dildar / Dara / Roman /235 rûpel / Rezber 2021