Diyarname
Li ser nûçeyên ku “Şivan Perwer” rakirine nexweşxaneyê Perwer daxuyaniyeke weşand û got: “Tenduristiya min gelek baş e. Ji bo albuma nû ez niha li studyoya xwe dixebitim.”

Rojnameya tirk Akşamê nivîsî (05.11.2011) ku Şivan Perwer ji ber nexweşiya dil û tansiyona çavan rakirin nexweşxaneyê. Di nûçeyê de tê gotin ku menejerê Perwer, Eyub Bischoff ev agahî daye wan.
Malperên kurdan jî bêyî xwe bigihîne Şivan Perwer, nûçeya Akşamê girtin û weşandin.  Lê Perwer li ser belavbûna nûçeyê daxuyaniyeke weşand û got: “Çend agahiyên nerast û tevlihev di derheqê min de li van şapatên dawiyê, di medya de derhatine. Bi vî awayî ragihandinên di rojnamên Tirkî li ser nexweşiya dilê min ne rast in. Dilê min xurt û bi hêz e. Tendurustiya min gelek baş e. Ez piştî demek direj albumek bi rêk û pêk amade dikim. Ji bo albuma nû vê gavê li studiyoya xwe dixebitim da ku ta dawiya salê tevabikim. Bila dilê we rehet be. Guh nedin derewan û Eyub Bischoff jî bi tenê hevaleke, ne menejerê min e. “
Her wiha Perwer nûçeya li ser wî derketibû ku dê di fîlmekî de bilîze jî wekî derew derxist û got: “Ji bilî vê yekê, nûçeyê li ser min ji bo lîstika di fîlmek sînemayê de ku berî demekî derketibû jî ne rast e û bê haya min navê min hatiye bikaranîn.”
Di dawiya daxuyaniya xwe de Şivan Perwer cejna Qurbanî ya gelê kurd û civata misilman pîroz kiriye û hêviya ku ev cejn bibe firsenda aştî û aramiyê kiriye.