Diyarname

Nivîskar Sîdar Jîr beşdarî “Sohbetên Çayê” bû û li ser kodên civakê, kodên wêjeyê axivî, “Di wêjeyê de kodên te xurt bin tu yê bi ser bikevî.”

Chalak Events vê carê di “Sohbeta Çayê” de nivîskar Sîdar Jîr kir mêvan. Di sohbeta ku moderatoriya wê Evîn Aydin kir de li Nînova Cafe ya li Taksîma Stenbolê li dar ket.

Nivîskar Sîdar Jîr li ser wêjeyê, tiştên ku di wêjeyê de lê digere, bala xwe dide axivî û got, “Di ebediyatê de mijar însan e, însan li ser koka xwe ye, ji wir digire dîsa dide wir. Di rastiya xwe de tiştek nû tune, em hinek nû dikin.”

Jîr qala lehengên miletan kir, gotin anî ser a kurdan û got, “Lehengên miletan hene, ew dikin ku milet li ser lingan bimînin. Belkî destana Kawa tunebûya kurd jî tunebana. Belkî tiştek din heba. Dema tu wêjeya xwe bi van kodan binivîsî dinya te dê wisa qebûl bike. Lehengên dîrokî, kodên dîrokî, hene bi van kodan em ber bi însan ve diçin. Di wêjeyê de ez zêde bala xwe didim van.”

Li ser meseleya xurtbûna edebiyata mirov a di cîhanê de jî Jîr mînak dan û ev yek lê zêde kir, “Di edebiyatê de tu çiqas xwe bî, cîhan ew qas te qebûl dike, te wekî te li xwe zêde dike. Yan na, tu herî wekî wan binivîsî jixwe ew hene, dê çima te bixwînin? Ez bi xwe, di metnan de li reseniyê digerim. Kodên te xurt bin tuyê bi ser bikevî. Em ji xwe dest pê bikin, helbet ev nayê wê maneyê em modernîzmê red bikin. Divê em xwe nû bikin.”

Jîr ji muzîka kurdî ya resen, ji wêje û sînemaya kurdî jî mînak dan û bal kişand ser ên ku xwe, koka xwe, kodên xwe digirin dest çiqas bi ser dikevin û yên ku ji koka xwe dûr diçin êdî nayên xwendin. 

Piştî sohbetê Jîr pirtûkên xwe bo xwendevanan îmze kirin.