Amed
Yekemîn Ajansa Nûçeyan a Jinan bi navê JINHA îro dest bi weşana xwe kir. Bi vê yekê li nav kurdan (dibe ku li dinyayê) yekemîn ajansa ku têde tenê jin dixebitin û weşana li ser jinan dike vebû.

Rêvebera ajansê Hazal Peker diyar kir ku di encama lêkolîneke berfireh de ew dest bi weşana xwe dikin. Ew gotinên "Û em dinivîsînin, bê ku bibêjin ka zilam çi difikirin" a Vîrginia Woolfê esas digirin. Peker destnîşan kir ku armanca wan a sereke ew e ku pêşiya feraseta çapemeniya ku zilam wekî kirde, jin jî wekî heyber dibîne bigire lewma wan jî wekî alternatîf biryara weşana ajansê dane.

Îro 102'yemîn salvegera 8'ê Adara Roja Jinên Kedkar a Cîhanê bû. Li gelek welatan ev roj hate pîrozkirin lê li nav kurdan hewldaneke nû hebû û jinên kedkar vê carê dest diavêtin qadeke din, qada nûçeyan.

Şaredarê Bajarê Mezin ê Amedê Osman Baydemir, yekemîn kameramana jin a li Tirkiyeyê Şehbal Şenyurt Arinli jî beşdarî vekirina JINHA'yê bû
Ajans li bajarên wekî Êlih, Şirnex, Stenbol, Wan û Enqerê dê nûnertiyan veke. Ajans bi 3 midûrên nûçeyan û 10 xebatkarên jin dest bi weşanê dike.

Di encama xebateke 6 mehan de bi hevdîtinên rêxistinên jinan, rêxistinên saziyên sivîl û rojnamegerên jin re biryara avasaziya ajansê hat dayîn. Xebatkarên ajansê pêşî li ser azadiya zayenda civakî perwerdehî dîtin. JINHA bi kurdî û tirkî weşanê dike. Berpirsa beşa tirkî Hazal Perek, berpirsa beşa kurdî jî Xangul Ozbek e.