Amed
Di festîvala Amedê de meşa ji Deriyê Riha heta Deriyê Çiyê pêk hat û dûre jî di konserê de dengê stranan bilind bû.

8'emîn Mîhrîcana Çand û Hunerê ya Amedê, bi meşa ku li Deriyê Rihayê bi beşdariya bi hezaran kesên kincên herêmî li xwe kirin, destpê kir. Di konsera ku piştî meşê ji aliyê Mehmet Atli, Bulent Turan û Vedat Yildirim ve hatin gotin, amedî kêfxweş bûn.

Meşa Festîvala Amedê Deriyê Rihayê dest pê kir û heta Deriyê Çiyê dom kir. Meşvanan pankarta 'Meşa Mîhrîcanê' da pêşiya xwe û li dû meşiyan. Di meşê de Şaredarê Bajarê Mezin ê Amedê Osman Baydemîr, Seroka DTP'ê û mebûsa Mêrdînê Emîne Ayna, mesûnên DTP'yî yên Amedê Akin Bîrdal, Aysel Tugluk, mebûsê serbixwe yê Culemêrgê Hamît Geylanî, parlementerê berê yê DEP'ê Hatîp Dîcle jî amade bûn. Koma akrobasiyê "Helliom" ku ji Fransayê hatibû bi wesayîta xwe ya mîna Deveyê Pêxember e û kincên xwe yên wek kêzikan, eleqeyek mezin dît. Dom û ribabvan jî bi amûrên xwe yên muzîkê beşdarî meşê bûn.
Meşa ku li Deriyê Rihayê bi def û zirneyan despê kir, di ser Kolana Mêrgîehmedê re, ber bi Kolana Gazî ve dom kir. Di meşê de diruşm hatin qîrandin

Konsera destpêkirina 8'emîn Festîvala Çand û Hunerê ya Amedê ji aliyê stand-Upkar Murat Batgî ve hate pêşkêş kirin. Pêşî hunermend Mehmet Atli ku pêr ji ber baranê konsera wî nîvî mabû derket ser dikê û stranên xwe pêşkêş kirin. Temaşevanan eleqeyeke mezin nîşan da.
Şaredarê Bajarê Mezin ê Amedê Osman Baydemîr jî axaftineke kir û got: "Xebatên ku di 80 salên Komarê de ji bo Amedê nehatine kirin, di van 8 salan de hatine kirine."
Baydemîr li ser festîvalê jî wisa got: "Çavê hemû Rojhilata Navîn, li ser festîvala Amedê ye. Êdî Amed bû marqeya festîvalê. Ev serketina we ye."
Axaftina Baydemîr gelek caran bi slogana "Amed bi te serbilind e" hate birîn.

Piştî axaftinan koma akrobasiyê lîstikên xwe pêşkêş kirin. Dûre Koroya Zarokan a Şaredariya Bajarê Mezin a Amedê, Bulent Turan, solîstê Koma Kardeş Turkulerê Vedat Yildirim derketin ser dikê. Bi hezaran kesan, stranên "Felek" û "Li Amedê" yên Bulent Turan, bi yekdengî bi Turan re got

Foto: Velî AY / DÎHA