Diyarname
Li gundê Mewrekê yê navçeya Dîgorê ya Qersê, ji bo bîranîna pêşengê damezirîner ê Komara Kurdistanê Qazî Mihemed, 'Mala Muze û Çandê ya Qazî Mihemed' hate vekirin. Ev salek e parêzer û mebûsê berê Mahmut Alinak li ser vekirina vî cîhî xebat dikir.

Îro bi beşdariya Rêveberên DEM Partî, Hevşaredarên Qaxizmanê Guner Hatay û Mehmet Alkan ku li şûna wan qeyûm hatiye tayînkirin, Şaredarê Pazarcixê Husnu Anci, çîrokbêj Ayhan Erkmen û gelek kesên din muze hat vekirin.
 
Siyasetmedar û parêzer Mahmut Alinak di merasimê de axivî û got: “Dengê Qazî Mihemed li Serhedê bilind dibe. Di heman demê de li vir ala reş li ba dibe. Ev der mala şînê ya Kurdistanê ye. Ev der, mala şînê ya Koçgirî, Geliyê Zîlan, Çiyayê Agiriyê, Roboskê û Jêrzemînên Cizîrê ye. Ji bo şehîdên Kurdistan û cîhanê mala şînê ye. Lewma ev der bibe ziyaretgeha me. Kurdistan kengî azad bibe, wê rojê dê ev ala reş bê daxistin û li şûna wê rengên kesk, sor û zer bên li ba kirin.” 
 
Piştî axaftinan muze hate vekirin û beşdar li hundirê wê geriyan. 
 

Vîdeoyek: