Amed
Înîsiyatîfa Yekîtiya Demokratîk li ser êrîşên çekdarên Artêşa Ereb a Sûriyeyê  û hêzên li pişta wan ên i ser rojavayê Kurdistanê daxuyaniyeke nivîskî belav kir. Însiyatîfê banga rawestandina êrîşan kir

Daxuyaniya Înîsiyatîfa Yekîtiya Demokratîk wiha ye:

“Bi bijerdeya leşkerî siberojeke aştiyane û hevpar li sûriyeyê ava nabe!

Ji ber şerê navxwayî ya Sûriyeyê bi sed hezaran kesan jiyana xwe ji dest dan, bi milyonan kes birîndar û koçber bûn. Her ku rastiya qada Sûriyeyê ya pirreng û piralî hat înkarkirin, li ser gel û baweriyan komkujî hatin pêkanîn, polîtîkayên zext û zordariyê hatin meşandin.

Piştî têkçûna rejima Baasê, hemû pêkhateyên Sûriye îro jî di qonaxeke krîtîk de derbas dibin. Lewra dixuye ku an li Sûriyeya nû dê ji bo her kesî pergaleke demokratîk were avakirin, an rejima Baasê dê xwe di şexsiyeta HTŞê de jinûve bide jiyandin.

Êrîşên ku li ber çavên cîhanê li ser Durzî, Elewî û Kurdan pêk tên, hêviya siberojeke aştiyane û demokratîk ji holê radike. Hikumeta Demkî ya Şamê li hemberî daxwaz û pirsgirêkên gelan amûrên demokratîk bi kar naîne, hertim serî li “bijardeya leşkerî” dike. Em hemû aliyan hişyar dikin ku bi israra şer û bijerdeya leşkerî siberojeke hevpar li Sûriyeyê ava nebû, ji niha şunde jî dê ava nebe.

Tevî xebatên dîplomatîk û gavên niyeta baş ên Kurdên Sûriyeyê, êrîşên komên çekdar ên bi girêdayî Hikumeta Şamê didomin. Ji ber êrîşên li dijî Kurdan, DAÎŞ jî xwe dîsa zindî dike û bi destwerdana hin dewletên herêmî li ser pergala demokratîk a Rojava êrîşeke piralî tê meşandin. Lewra tirsa rejima HTŞ û hin hêzên herêmî ew e ku pergala ku Rojava ji aliyên gelan ve hatiye avakirin bibe mînakeke demokratîk.

Êrîşên li ser Tebqa, Reqa û Dêrezorê nayên qebûlkirin û bi van êrîşan hemû hevpeyman cardin tên binpêkirin. Dîyar e ku ligel hedefgirtina destkeftiyên gelê Kurd, Hikumeta Şamê û hin hêzên herêmî dixwazin ku di navbera şêniyên herêmê de aloziyên etnîkî û olî bidin destpêkirin. Divê encama van êrîşan di serî de Dewletên Yekbûyî yên Amerîka (DYA), ji aliyê hemû dewletên garantor baş were hesabkirin.

Bi berdêlên giran tê tecrûbekirin ku di pergal û feraseta HTŞê de tu mafên gel û baweriyan, tu berjewendiyên aborî ne di ewlehiyê de ne. Tevî banga diyalog û bicihanîna Hevpeymana 10ê Adarê li ser Rojava êrîşên hovanê nayên rawestandin. Hemû gelên cîhanê dizane ku gelê Rojava bi berdêlên giran li dijî DAÎŞa hov şer kir û rûmeta mirovahiyê parast. Ji ber vê, dora hemû mirovahiyê ye ku li dor Rojava kom bibe û li şoreş û pergala Rojava xwedî derkeve.

Em bang li Hikumeta Şamê ya Demkî û komên tundrew ên HTŞê dikin ku êrîşên li ser Rojava bi dawî bikin. Di heman demê de di serî de DYA, hêzên koalîsyanê ên navneteweyî û dewletên garantor rola xwe bilîzin û li dijî binpêkirin û êrîşan gavên adilane û berbiçav biavêjin. Dîsa divê Tirkiye jî sekna xwe ya neyînî ya dijî maf û destkeftiyên gelê Kurd biguhere û roleke avaker bilîze.

Ji Japonyayê heta Amerîkayê, ji Mehabad heta Hewlêr û Amedê Rojava xeta sor a hemû Kurdan e. Dil û ruhe her Kurdekî ligel Rojavayê ye. Ji ber vê ye kêsên ku dixwazin xwişk û biratiyê ava bikin, divê di serî de nêrîna xwe ya dijminane ya li dijî Rojava biguherînin. Em bang li gelê Kurd û dostên wan dikin ku bi ruhê azadiyê yek bin, piştevaniya xwe xurttir bikin. Lewra her êrîşeke li Rojava tê kirin, li hemû Kurdan tê kirin; serkeftin û parastina destkeftiyan ancax bi yekîtiyê pêkan e.”

**

Nûçeyên Eleqedar:

- Rojava, 20'ê mehê nûçeyên li ser îro...

-