DiyarName.Com

9'ê mehê agahiyên li ser Rojava...

...ev tê nûkirin...

Şandeyek Şamê serdana bîrên petrolê yên li Rimêlanê kir
Şandeyeke hikûmeta demkî ya Sûriyeyê di çarçovevê peymana 29'ê Rêbendanê de serdana Rêveberiya Zeviyên Petrolê ya Rimêlanê kir.
ANHA'yê ragihand ku şande ji nûnerên Hêzên Ewlekariyê yê hikûmeta demkî, Rêveberiya Ewlehiya Derî û Balafirgehan, Desteya Giştî ya Balafirgehan a Sivîl û nûnerên Şîrketa Sûriyeyê ya Petrolê pêk dihat. Heyetê ligel Hêzên Asayîşê ya Rojava serdana Rêveberiya Rimêlanê kir.
Şandeya Hikumeta Demkî ya Şamê ji Rêveberiya Ewlehiya Derî û Balafirgehan Ehmed El Ehmed, alîkarê serokê Desteya Giştî ya Balafirgehan a Sivîl Emced Nexal, gerînendeyê Peywendiyên Saziyan Sefwan Şêx Ehmed, cîgirê serokê Şîrketa Sûriyeyê ya Petrolê Welîd El Yûsif, berpirsê zeviyan Xalid Elêc û endazyarê Şîrketa Sûriyeyê ya Petrolê Elî Qurunful û berpirsê Piştevaniya Cîbicîkar Macid Hebîb pêk dihat.

Ji rêveberiya kurdan, Rêveberiya Giştî ya Zeviyên Rimêlanê Ehmed Îbrahîm, cîgirê Rêveberiya Kar û Barên Petrolê Diyab Xelêf, Cîgirê Rêveberiya Kar û Barên Malî Ebduselmam û Cîgirê Rêveberiya Kar û Barên Pîşeyî Îsam Kurdî şandeya hikûmetê pêşwazî kir.
Di çarçoveya entegrasyonê de şande dê bi nûnerên Rêveberiya Zeviyên Petrolê ya Rimêlan re civiya û dê mekanîzmeya xebatên rêveberiyê û rewşa rêveberî û ewlehiya herêmê nîqaş bikin.
**

MSD'ê banga rakirina dorpîça ser Kobanî kir
MSD'ê (Meclisa Sûriyeya Demokratîk) li ser rewşa dorpîça li ser Kobanî bi nivîskî daxuyanî da û banga lezgîn kir. MSD'ê diyar kir ku dorpêç zêdetirî mîlyonek mirovên niştecihên xwecihiyên Kobanî û koçberên ji Efrîn, Şêxmeqsûd, Eşrefiyê, Tebqa, Reqa û gundewarên wan dike hedef.
MSD'ê bang li Koalîsyona Navneteweyî ya li dijî DAIŞ'ê jî kir ku ji bo rakirina dorpêça li ser Kobanî bikeve nava tevgerê û ji Neteweyên Yekbûyî, Konseya Ewlekariyê û rêxistinên mirovî yên navneteweyî xwest ku komîteyên lêpirsînê bişînin herêmê, korîdorên mirovî vekin û van rûdanan wekî sûcekî destnîşan bikin û hesab bixwazin.
Di daxuyaniyê de MSD'ê bang li wijdanê cîhanê kir û got, "Bajarê ku jiyan parast û nirxên mirovahiyê bi ser xist nabe ku bi komkujiyan re rû bi rû were hiştin. Rûmeta gelê Kobanî ne mijara bazarê ye. Îradeya gelê wê dê bi dorpêç û birçîkirinê neşikê.”
**

Ciwanên tevlî berxwedanê bûn bi girseyî hatin pêşwazîkirin
Îro li deriyê bajarokê Qeladizê yê ser bi Îdareya Raperîn bi beşdariya girseya gelê welatparêz, azadîxwaz û malbatên wan ve, sê ciwanên ku di çarçoveya seferberiya giştî ya rojavayê Kurdistanê berê xwe dabûn Rojava û tevlî berxwedana rûmetê bûn, îro vegeriyan Başûr, bi awayek bi heybet hatin pêşwazîkirin. Her sê ciwanên ji Qeladizê mehekê di berxwedana rûmetê de cih girtin.
Ciwanên bi navê Ebdullah Xidir, Mihemed Hoşyar û Alan Bekir yên ji bajarokê Qeladizê ne ku îro vegeriyan Başûr gotin; “Piştî ku me dît dijminên me zarokên Kurdan qetil dikin, bêrêziyê li beramberî cenazeyên şervanan dikin, wijdana me qebûl nekir ku li mala xwe rûnin û lê binerin.”

YPJ çû serdana Qaliyê Hesekê
Serfermandara Giştî ya YPJ'ê Rojhilat Efrîn û Viyar Dara ligel komek endamên YPJ'ê çûn serdara Waliyê Hesekê Nûredîn Îsa Ehmed.
Walî Ehmed li ber derî pêşwazî li endamên YPJ'ê kir.
**

Heyeta Rojava diçe Şamê
Heyeteke ji Rojava bi navê "Heyeta Kurdî" ji bo hevdîtinan dê here Şamê
Peymana di navbera HSD û Şamê de 29'ê rêbendanê hatibû îmzekirin. Heyet li ser vê peymanê dê here hevdîtinan bike.
Li gorî agahiyên ANHA'yê ji çavkaniyên partiyan girtiye, Heyeta Kurdî ya ku di Konferansa Yekrêzî û Yekhelwesta Kurdî ya Rojavayê Kurdistanê de (roja 26'ê avrêla 2025'an li bajarê Qamişloyê li dar ket) hatibû diyarkirin, wê biçe Şamê.
Heyet wê kengê here tam zelal nebûye, lê tê gotin ku di kurtedemê de dê here.
Heyet li Şamê li ser parastina mafan, mîsogerkirina wan a di Destûra Bingehîn de, derbarê demokratîkbûna Sûriyeyê de hevdîtinan bike.

MSD'ê banga rakirina dorpêça ser Kobanî kir