DiyarName.Com

Diyarname
Ev 21 roj in li Kobanî dorpêç didome. Ji ber vê rewşeke gelek giran li holê heye.
Hevserokê Desteya Tenduristiyê ya Kantona Firatê Ehmed Mehmûd li ser rewşê ji bo ANF’ê re axivî.
Va ne hin gotinên Ehmed Mehmûd:
- Li bajêr 4 nexweşxaneyên giştî û 2 nexweşxaneyên taybet hene û ev nexweşxane 24 saetan xizmetê didin.

MAZOT BER BI XILASBÛNÊ VE YE
- Divê nexweşxane bi elektrîkê bênavber bixebitin. Li nexweşxaneyên giştî sê jenerator û li nexweşxaneyên taybet jî du jenerator hene. Ev jenerator rojane nêzî tonek mazot dixwin.
Pêdiviya 12 ambûlansên li bajêr bi mazotê heye, bi vê pêdiviya bi mazotê mehane digihîje 10 tonan. Stokên mazotê yên heyî tenê dikarin 10 rojan têrê bikin.

GELEK DERMAN QEDIYANE
- her roj bi sedan nexweş serî li nexweşxaneyan didin, bi taybetî ji ber penaberên ku ji Reqa û herêmên derdorê tên, nexweşxane bi temamî tije bûne û nexweşên nû nayên qebûlkirin.
- Ji ber şert û mercên zivistanê nexweşiyên şewbê zêde bûne û stokên dermanên serma girtinê qediyane.

OKSÎJEN NEMA YE
- Oksîjen nemaye; dermanên bêhnkurtkê, dermanên ji bo tehlîlan, dermanên anesteziyê yên ku di emeliyatan de tên bikaranîn û dermanên nexweşên tansiyon û şekir bi temamî qediyane û bûne hewcedariyeke lezgîn.

DIBISTAN JI BO PENABERAN HATIN VEKIRIN, PERWERDE SEKINÎ
- Li Kobanê di asta seretayî, navîn û amadehiyê de bi giştî 17 dibistan û zanîngehek heye. Di van dibistanan de her sal nêzî 72 hezar xwendekar perwerde didîtin. Li Zanîngeha Kobanê jî hezar û pêncsed xwendekar hebûn. Lê belê ji ber êrîşên çeteyên HTŞ’ê û ji ber dorpêçkirina bajêr, bi hezaran xwendekar nikarin perwerdeya xwe bidomînin. Beşeke mezin a dibistanan, ji ber êrîşan ji bo penaberên ku ji cih û warên xwe bûne, wekî cihê stargehê hatine veqetandin.

FIRIN Û ÇÊKIRINA NAN DI NAV METIRSIYÊ DE YE
- Li navenda bajarê Kobanî du firinên giştî, li gundan jî sê firin hene. Ev firin neçar in ku her roj ji bo zêdetirî 500 hezar kesî nan hilberînin. Hewcedariya van firinên ku bi mazotê dixebitin, mehane 150 hezar lître mazot e. Saziya berpirsyar a firinan diyar kir ku stokên mazotê yên heyî tenê dikarin 10 rojan têrê bikin û piştî vê demê firin nikarin xizmetê bidin.

21 ROJ IN ELEKTRÎK TUNEYE
Hevserokê Desteya Enerjiyê ya Kobanî Welîd Cuma jî li ser elektrîkê gotiye;
- Ji 18’ê rêbendanê/çileyê ve li Kobanî elektrîk bi temamî hatiye birîn.
- Di qonaxa yekem de li Kobanî û Sirînê elektrîk hatiye birîn, piştî sê rojan bi awayekî demkî hatiye dayîn lê piştî nîv saetê dîsa hatiye birîn. Navenda bajarê Kobanî, 360 gund 21 roj in bê elektrîk in.
- Birîna elektrîkê rasterast bandorê li nexweşxane, firin û dabînkirina avê dike.
- Gelek nexweş li malên xwe amûrên oksîjenê bikar tînin û ev rewş xetereyeke mezin li ser jiyana wan çêdike.

XETA ELEKTRÎKÊ BIRÎNE
- Xeta elektrîkê ya ku tê Kobanî di ser Sirînê re derbas dibe, ev xet hatiye birîn û bi vî rengî nahêlin elektrîk bigihîje bajêr.
- Xeta avê jî hatiye birîn; di demên ku elektrîk hebû de, av ji Çemê Firatê dihat pompakirin û digihîşt bajêr.

KRÎZA AV, XWARIN Û ŞÎRÊ ZAROKAN
- Ji ber dorpêç û birîna elektrîkê ya ku 21 roj in didome, li Kobanê krîzeke giran a avê heye. Ji 15 stasyonên avê yên li bajêr 14 stasyon ji ber birîna elektrîkê bi temamî ji xizmetê ketine.
- Gel hewl dide pêdiviya xwe ya avê ji bîran çareser bike, lê ji bo kişandina ava bîran jî elektrîk lazim e. Ji ber vê yekê, bi derfetên kêm jenerator tên bikaranîn.
- Şîr û xwarina zarokan (mama) hema bêje qediya ye. Ev rewş bi taybetî ji bo pitikên nûbûyî metirsiyeke jiyanî çêdike. Her çend bi rêyên alternatîf hewl tê dayîn ku hinek xwarin bê dabînkirin jî, ev alîkarî tenê dikarin hewcedariya beşeke pir piçûk a gel dabîn bikin.

Li Kobanî rewşa dawî