Qamişlo
24 partî û rêxistinên siyasî yên kurdî yên li rojavayê Kurdistanê û Bakur û Rojhilatê Sûriyeyê, der barê “Hilbijartinên Meclisa Gel” a hikumeta Şamê de daxuyaniyeke hevpar dan. Partiyan destnîşan kir ku ew van hilbijartinên sexte red dikin û got, "Dayîna 4 kursiyan ji bo kurdan  diziya vîna gel e.  Li gorî nifûsa me divê ji 40 kursiyan kêmtir nebe.”

Hikumeta Demkî ya Sûriyeyê dixwaze hilbijartinên “Meclisa Gel a Sûriyeyê” ji nû ve saz bike. Di vê çarçoveyê de ji bo kurdan kotayeke saz kiriye û dixwaze tenê 4 kursiyan bide kurdan. Li hemberî vê 24 partî û rêxistinên siyasî li Qamişloyê bi hev re daxuyanî da.
Partiyan ew hilbijartin wekî “pêvajoyeke tayînkirina pûç” nirxandin û diyar kirin ku hikumeta Şamê bi vê gavê qanûn û polîtîkayên nijadperest ên li dijî gelê kurd ji nû ve zindî dike.

'Projeya nijadpereset a dijî kurdan'
Partiyan di destpêka daxuyaniyê de bal kişandin ser dîroka şoreşê û fedakariyên gelê kurd ên li dijî rejîma Baas û çeteyên DAIŞ'ê û wiha gotin: “Di demekê de ku pêkhateyên Sûriyeyê li bendê ne ku dewleteke hevwelatîbûn û şirîkatiyeke rastîn ava bikin û sûdê ji ezmûna Rêveberiya Xweser a Demokratîk bigirin. Hikumeta Şamê guh neda van hemû rastiyan. Hilbijartinên sexte yên bi navê ‘Hilbijartinên Meclisa Gel a Sûriyeyê’ ragihandin. Ev di rastiyê de ne tişteke ji bilî pêvajoyeke tayînkirina pûç ku vîna dengdêran tune kiriye, mekanîzmayên tecrîdkirina neteweyî û siyasî ji nû ve hilberandiye û projeyên nijadperest ên li dijî kurdan teqez kiriye.”

‘Hewldana asayîkirina guhertina demografîk’
Di daxuyaniyê de wekî mînakeke şênber behsa tayînkirina kesekî ji “Erebên Xemer (Kembera Erebî)” wekî nûnerê Serêkaniyê hat kirin. Partiyan diyar kir ku ev gav, tê wateya normalîzekirin û asayîkirina guhertina demografîk a li herêmên kurdan û niyetên xirab ên hikumeta Şamê.
Sazî û partiyên siyasî, sînordarkirina temsîliyeta kurdî bi 4 kursiyan a ji nava 210 kursiyên Meclisa Gel, wekî binpêkirineke eşkere ya li ser rastiyên demografîk û siyasî pênase kirin û wisa hat gotin, “Gelê kurd li rojavayê Kurdistanê pêkhateyeke resen û dîrokî ye û rêjeya wî ji ji sedî 20’ê hemû nifûsa Sûriyeyê kêmtir nîn e. Îro bi rêya van tayînkirinên sîstematîk, kurd ji dengê xwe yê rastîn û mafê xwe yê hevpar ê di biryardana niştimanî de bêpar tên hiştin. Em di hêz û partiyên siyasî yên kurd de vê yekê bi tu awayî qebûl nakin. Mafê me yê temsîliyeta parlamentoyê ya rastîn, li gorî nifûsa me divê ji 40 kursiyan kêmtir nebe.”

‘Kî qebûl bike wê bibe berpirsyarê dîrokî’
Di beşa dawî ya daxuyaniyê de hişyariyeke tund hat dayîn û hat xwestin ku tu aliyên kurdî van 4 kursiyan nepejirînin: “Qebûlkirina van çar kursiyên lawaz, dê bibe mînakeke dîrokî ya pir xeternak. Ji ber ku di pêşerojê de dê li ser vê yekê pişkên pêkhateya kurd di hemû astên dewletê, wezaret, saziyên dadwerî û dîplomatîk de werin diyarkirin. Ev tê wateya biryara darvekirina siyasî ya li ser mafên me yên ji bo nifşên pêşerojê. Tu aliyekî kurdî xwediyê wekaleteke gelêrî nîn e ku vê yekê qebûl bike û yên qebûl bikin jî wê berpirsyariya dîrokî ya vê kiryarê li pêşberî gelê kurd hilgirin.”
Di dawiyê de diyar kirin ku ewê ji bo Sûriyeyeke demokratik, piralî û nenavendî bixebitin.

Yên daxuyanî îmze kirin:
- Partiya Yekîtiya Demokratîk (PYD)
- Kongra Star
- Partiya Kesk a Demokratîk
- Partiya Lîberal a Kurd li Sûriyeyê
- Partiya Komunîst a Kurdistanê
- Partiya Demokrat a Kurdistanî – Sûriye
- Partiya Demokrat a Kurd li Sûriyeyê
- Partiya Çep a Kurd li Sûriyeyê
- Partiya Çep a Demokrat a Kurd li Sûriyeyê
- Şepêla Pêşerojê ya Kurdistanê
- Partiya Guhertina Demokratîk a Kurdistanê
- Tevgera Nûjen a Kurdistanê
- Yekîtiya Kedkarên Kurdistanê
- Partiya Rêkeftina Demokratîk a Sûriyeyê
- Tevgera Çaksaziya Sûriyeyê
- Partiya Roj a Demokrat a Kurd li Sûriyeyê
- Partiya Biratiya Kurdistanî
- Partiya Nîdal a Demokratîk
- Partiya Demokrat a Kurdistanî – Rojava
- Partiya Kombûna Niştimanî ya Kurdistanî li Sûriyeyê
- Partiya Demokrat a Kurd li Sûriyeyê (El-Partî)
- Partiya Yekîtiya Demokrat a Kurd li Sûriyeyê
- Tevgera Civaka Demokratîk (TEV-DEM)
- Şepêla Çaksaziyê ya Sûriyeyê