Diyarname
Stranbêj, nivîskara gotinên stranan, lîstikvan û yek ji stranbêja bi bandor a muzîka Country Dolly Parton di 80 saliya xwe de mir. Malbata wê bi ser tora civakî re ragihand ku wê roja 25'ê mehê canê xwe ji dest daye.
Stranbêj Dolly Parton roja 19'ê rêbendana 1946'an li eyaleta Tennesseyê hatibû dinê. EW bi stranên ‘I Will Always Love You’, ‘Jolene’ û ‘9 to 5’ dihat zanîn.
Parton ligel muzîka xwe wekî kesek xêrxwaz jî dihat nasîn ku di jiyana xwe de ji bo mafê perwerdehî, xizmetên tenduristî û xebatên afetê her alîkarî dikir.
Serokdewletê berê yê DYA'yê Joe Biden ji bo wê gotiye, "Ger bi kurtî bêji, Dolly Parton amerîkiyeke taybet bû. Ji bo mîlyonan çavkaniya îlhamê bû. Wê bê rawestan ji bo jinan û ji bo wekheviyê jî têkoşîn da. Di warê belavkirina pirtûkên ji bo zarokan de gelek alîkarî kir."
Senatorê Tennesseyê Bernie Sanders ku ji bo serokdewletiya DYA'yê ji Partiya Demokratan bûbûn pêş berendam ji bo Parton gotiye, "Ew rêbereke îkonîk bû ku ji dewlet û welatê me hez dikir. Çûyîna wê bû sedem ku dê kes nikaribe vê valahiyê dagire. Dolly, emê her bêriya te bikin."
Li aliyê din Cîgear Biden Kamala Haris, Serokdewletê berê Bill Clinton û gelek siyasetmedarên din jî ji bo wê peyam belav kirin.
Parton di sala 1988'an de li Tennesseyê Weqfa Dollywood vekiribû û bi vê rêyê alîkariya perwerdehiya zarokan dikir. Serokê weqfê Jeff Conyers jî gotiye, "Em serbilid in ku emê mîsyona wê bidomînin."
Parton bi sernavê "Dolly Parton’s Imagination Library" ji bo xwendin-nivîsandinê teşwîq bike ji sala 1995'an ve heta niha pirtûk belav dikir. Tê gotin ku ji wê rojê heta niha ji 300 mîlyon heb zêdetir pirtûk belav kirine.
Ji ber ku bavê Partonê xwendin û nivîsandin nedizanî, wê hemberî vê yekê gaveke wisa dabû dest pê kirin û di jiyana xwe de li welatên wekî DYA, Kanada, Îngilistan, Avustralya û Îrlandayê her meh pirtûkên ji bo zarokên heta 5 salî bê pere pirtûk dişandin.
Ji qada muzîkê jî muzîkarên wekî Paul McCartney, Cêline Dion, Taylor Swift, Eminem, Elton John û gelek kesên din li ser mirina wê peyam belav kirin.
.jpg)
