SILÊMANÎ

Mihemed Emîn Penciwênî binavê “Ez Çawa Bûme Pirek” derxistibû, niha çapa wê ya duyemîn hat kirin. Ji bo vê çapê jî li Silêmaniyê çalakiyeke danasînê hat kirin. Di çalakiyê de, sedemên nivîsandina pirtûkê, naveroka pirtûkê, ji zarokatiya nivîskar bigire heya beşdarbûna wî di têkoşînê de û rola jinan di pêvajoyên cuda de, hatin nîqaşkirin.

Şaxa Silêmaniyê ya Yekîtiya Nivîskarên Kurd (KWU) 2'yê mehê li Silêmaniyê ev çalakî bo çapa duyemîn a pirtûka “Ez Çawa Bûm Pirek” (Çon Bûm Be Pird) li dar xist. Pirtûk bi soranî ji aliyê nivîskar û siyasetmedar Mihemed Emîn Penciwênî ve hatiye nivîsandin. Gelek kes li çalakiyê amade bûn. Mamostayê Zanîngehê Dr. Şêrko Heme Emîn di çalakiyê de nirxandinek li ser naveroka pirtûkê kir.

Li gor nûçeya Rojnewsê Penciwênî li ser sedem, armanc û naveroka pirtûka xwe axivî û got ku ew bi salan e li ser ji nû ve nivîsandina bîranînên xwe difikirî û wiha got; “Heval û dostan gelek caran ez teşwîq dikirim ku ez dest bi vê nivîsandina vê pirtûkê bikim. Carnan dema min çîrokek an bûyerek girîng vedigot ku xwedî girîngiyeke zêde ya dîrokî bû, wan ji min gazind dikirin ku çima ez vê mijarê nanivîsim. Digotin, ewê wekî delîl ji bo tomarkirina dîroka siyasî ya Kurdistanê di pêşerojê de wê sûd jê were girtin.”

Li ser naveroka pirtûkê jî Penciwênî wiha got: “Bi vegotina ezmûna jiyana xwe, min hewl da ku rewşa siyasî û mirovî ya dema ku ez tê de jiya me, ji xwendevanan re vebêjim. Ev pirtûk di heman demê de hinek razên ku berê kes nekariye vebêje jî dihewîne. Ev pirtûk, beşek ji têkoşîna siyasî ye. Têkoşîna min a çandî û helbestî, ku min berhemên xwe bi hestek çandî û helbestî pêşkêş kirine.”

Paşê Mamostayê Zanîngehê Dr. Şêrko Heme Emîn jî der barê pirtûkê de agahî dan. Pirtûk ji heşt beşan pêk tê; Beşa yekem zarokatiya nivîskar vedibêje ku çawaniya çêbûna malbata wî vedibêje; ku dayika wî ji Rojhilat û bavê wî ji bakurê Kurdistanê bû û kariye sînorên çêkirî bişkîne. Şêrko Heme Emîn wiha got: “Taybetmendiya eşkere ya pirtûkê rastgotiya nivîskar di tomarkirina qonaxên jiyana xwe de ye. Bi taybetî serdema ku ew bi têkoşîna PKK’ê re nas bû û eşkere dike ku ew çawa bûye ‘pirek’. Ev wekî sermayeyek mezin ya ezmûna nivîskar tê hesibandin. Beşên din yên pirtûkê li ser hatina nivîskar bo Silêmaniyê, tevlîbûna wî ya Partiya Komunîst, beşdarbûna wî di rêxistin, xwepêşandan û têkoşîna sivîl de disekinin. Her wiha nakokiyên siyasî yên ku li şûna lihevkirinê parçebûn çêkirine, ronî dike. Nivîskar gelek wêneyên trajediya ramanên cuda pêşkêş dike ku hîn jî di civakê de bedelê didin.”

Di dewamê de bal kişand ser çûyîna Herêma Beqa ya Lubnanê û hevdîtina nivîskar Mihemed Emîn Pênciwênî bi Abdullah Ocalan re û wiha axivî; “Di derbarê hewldanên wî yên dîplomatîk de, beşek din ya pirtûkê behsa serdanên wî yên herêma Beqa ya Lubnanê û hevdîtina wî bi Abdullah Ocalan re dike, ku tê de nivîskar wekî ‘pirek” ji bo pêşîgirtina li destpêkirina şer tevgeriya. Her wiha rola wî di avakirina medyayek azad û meşandina dîplomasiya netewî ya bê-alî de destnîşan dike. Beşek din a pirtûkê behsa girtina Ocalan û komploya navneteweyî dike. Di pirtûkê de ka çawa mijara girtinê ji mijarek takekesî veguheriye mijarek netewî ya giştî, vedibêje. Wî nîşan da ku berevajî nêrîna rayedarên Tirkiyeyê yên wê demê, doza kurd nehatiye tunekirin. Di şûna wê de, niha pirsgirêka kurd di parlementoya Tirkiyeyê de bi pêvajoyek aştiyane tê nîqaşkirin.”