___Hogir Berbir___

10'emîn Pêşangeha Pirtûkan a Amedê bi coşeke mezin deriyê xwe ji bo xwendewaran vekir. Digel zehmetiyên aborî û kêşeyên weşangeriyê, îsal pêşangeh bi beşdariya weşanxaneyên kurdî û atmosfereke nû bala xwendevanan dikişîne ser xwe.

Cîhana weşangeriyê ku di salên dawî de bi krîzên aborî, bilindbûna lêçûnan û astengiyên cur bi cur re têdikoşe, bandora xwe li ser fûarên pirtûkan jî dike. Gelek weşanxaneyên mezin nikaribûn beşdarî fûarê bibin, lê tevî van hemû zehmetiyan, Pêşangeha Pirtûkan a Amedê ya îsal bi hêviyeke nû û "bayekî nû" dest pê kir.

ARAM XURTIR BEŞDAR BÛYE
Mînaka herî berbiçav a vê atmosfera nû, amadebûna Weşanxaneya Aramê bû ku wekî stûneke weşangeriya kurdî tê naskirin. Weşanên Aram ku bi salan e ji ber berhemên xwe yên kurdî û tirkî rastî astengiyên yasayî û êrîşan dihat, îsal bi awayekî xurtir cihê xwe di nava fûarê de girt û rengê xwe da fuarê.

NÛBIHAR HAT XELATKIRIN
Her wiha weşanxaneyên mîna Sîtav, Nûbihar û Morî jî bi standên xwe yên rengîn balê dikişînin. Bi taybetî Weşanxaneya Nûbiharê ku îsal cara 10'emîn e bê navber beşdarî fuarê dibe, ji aliyê rêveberiyên fûarê ve bi xelateke taybet hate xelatkirin.

ENSTÎTUYA AMEDÊ
Li aliyê din, Enstîtuya Kurdî ya Amedê jî bi xebatên xwe yên çandî, lêkolînî û pirtûkên zarokan bi coşeke mezin li kêleka weşanxaneyan cihê xwe girt û piştgiriyeke mezin da fuarê.
Lê belê tevî van erêniyan, hin pirsgirêkên kevneşopî jî berdewam dikin. Ji ber kêşeya cîh û pirsgirêkên aborî, Komeleya Wêjekarên Kurd û çend saziyên din dîsa li dawiya fûarê û li deverên ku zêde li ber çav nîn in hatin bicihkirin. Ev rewş bû sedema dilnizmiyê û bertekên nivîskar û xwendevanan.

Her wiha kêm-zêde beşdarnebûna weşanxaneyên tirkî jî li fûarê diyar bû. Hin weşanxane û nivîskar diyar dikin ku li hemberî van nêzîkatiyan, divê weşanxaneyên kurdî mîna sala 2016'an bi serê xwe tevbigerin û fûareke alternatif a serbixwe amade bikin.

Pêşangeha Pirtûkan a Amedê bi çalakî, îmze û panelan didome û tê çaverêkirin ku bandoreke mezin li ser jiyana çandî ya bajêr bike.
Fûar heta 4'ê meha pêşiya me vekiriye.