Amed Dîcle

Beriya çend rojan li başûrê Kurdistanê ji bo ku weşanên Nûçe TV û Stêrk TV li ser satelîta Nîl-Sat'ê werin temaşekirin kampanyaya îmzeyan pêk hat. Di encama vê kampanyayê de bi deh hezaran îmze hatin komkirin.
 
Wekî xebatkarên çapemeniya azad, televizyona Nûçe TV em ji hemû kesên ku ev kampanya dan meşandin û îmze kirin re slav û spasiyê xwe pêşkêşî wan dikin.Ev ji bo me alîkariyek û xwedî derketinek gelek girîng û bi wate ye. Divê were zanîn ku em jî dixwazin li ser satelîta nîlsat weşanê bikin ango li ser satelîtên din jî û dengê xwe bigihînin hemû parçeyên Kurdistanê û bibin mêvanê mala hemû  kurdan.
 
Hin temaşevan ji ber vê sedemê me rexne jî dikin. Lê bila were zanîn ku ligel hemû hewldanên me ev satelît ji ber  daxwazên dewleta tirk cih nadin me. Ev kampanya di yekemîn salvegera destpêka weşana televizyona me Nûçe TV de hat aşkerakirin. Wekî ku tê zanîn Nûçe TV 5’ê adara 2012'an de dest bi weşana xwe kir. Nûçe TV ku di sala 2005'an de lîsansa weşana xwe girtibû di sala 2012'an de dest bi weşanê kir.
 
Hêjayî gotinê ye, Nûçe TV yekemîn televizyona nûçeyan a bi kurdî ye. Piştî rawestandina weşanên ROJ TV ji ber pêdiviyan û daxwazên temaşevanan Nûçe TV dest bi weşanê kir.  Televizyona me bi weşana xwe ya 24 saetan hewl dide ku bûyerên ji cîhanê û Kurdistanê ji temaşevanan re ragihîne. Bi zaravayên kurmancî, soranî, dimilkî û dîsa bi zimanê tirkî û îngilîzî weşanê dike.
 
Di Nûçe TV de, hemû beşên civakê dikarin xwe bibînin. Hemû bûyerên aktûel, her wiha pêşketinên li çar parçeyên Kurdistanê hun dikarin serê saetê di Nûçe TV de bibînin. Dîsa bernameya nûçe jin, çalakî, pirsgirêk û têkoşîna jinan di ekranên Nûçe TV de her tim cihê xwe digire. Ligel nûçeyên serê saetê mijarên di rojevê de, di bernameyên zindî de têne  şîrovekirin.
 
Di nava salekê de Nûçe TV li Kurdistan û cîhanê bû referansek girîng. Lê belê wekî ROJ TV li ser Nûçe TV jî zext û zordestî hene û berdewam dikin.
 
Dewleta tirk ji bo ku weşanên me bide rawestandin di nava vê salê de hemû rê û rêbaz ceribandin.  Li ser hewldanên dewleta tirk satelîta Nîlsat weşana me birî û bi vî awayî niha li Başûr, Rojava û Rojhilat gelek kes nikarin li weşana me  temaşe bikin.
 
Dîsa li Danîmarka sekreteryaya medyayê li ser daxwazên dewleta tirk weşanên me 2 mehan dan rawestandin. Lê belê ligel hemû astengiyan jî Nûçe TV bi biryar e ku di nava vê salê de weşanên xwe dewlementir bike.
 
Lê divê temaşevanên me jî bi kampanyayên wekî ya li Başûr ji me re bibin alîkar.
 
Ne tenê kampanya her temaşevanekî me dikare ji me re nûçeyan bişîne, rexne, pêşniyar, materyal, dîmen, hema her tiştê ku em karibin bi kar bînin bişînê. Şert û mercên ku ev yek bê kirin hene.
 
Nûçe TV ya we ye em dikarin bi hev re rengîntir û dewlementir bikin. Li Nûçe TV ya xwe xwedî derkevin.

Ji Azadiya Welat hatiye girtin

**

Têbiniya Diyarnameyê: Nûçe TV yekemîn û tekane kanala nûçeyan a kurdan e. Me xwest li ser salvegera televîzyonê tiştinan binivîsin lê nebû. Ji ber tiştên ku me dixwest binivîsin Amed Dîcle di quncikê xwe de nivîsiye, me girîng dît ku vê nivîsê ji Azadiya Welat bigirin û biweşînin. Bi vê nivîsê em ji vir salvegera Nûçe TV pîroz dikin û hêviya temeneke dûdirêj dikin.