Weşana welatekî neynika wî welatî ye. Ji aliyê etîkê ve, ji aliyê ziman ve, ji aliyê bikaranîna agahiyan ve... Her tişt nîşan dide ku ew welat li kîjan astî yî.
Yê me kurdan jî wisa ye.
Emê di vî nivîsê de hemû aliyên etîkî deynin cihekê, tenê qala zimanê wan bikin.
Mesele ev e:
Dema gotin tê ser gotinê ji siyasetmedarên me yên Tevgera Bakur bigire heta yên muxalifên Tevgera Bakur her kes qala parastina kurdî dike.
Bi ser de yên muxalifên Tevgera Bakur lê zêde dikin û tevgerê wekî "Tirkiyeyiya ku Kurdistan firot" jî bi nav dikin. Lê em dinêrin bi çi zimanî vê yekê dikin? Bi tirkî.
Mînak 1:
Yekî* ji wan di weşaneke Başûrî de dinivise, êrîşên kuştinê li Tevgera Bakur dike. Ez qala rexneyan nakim ha... Bi çi zimanî? Bi tirkî. Binêrin weşanek başûrî (gelo Başûrî bi tirkî dizanin?) û bi tirkî.
Mînak 2:
Ji oldarên me, hinên din jî kurtedemek malperek vekirin.** Di nivîsa edîtor de qal dike dê malper kurdistanî be, nûçeyên li ser Kurdistanê biweşîne û filan û bêvan. Dema ev yek nivîsandine, dema ev malper amade kirine û dest bi weşanê kirine herhal ji xwe nepirsîne, "Gelo zimanê kurdên Kurdistanê bi tirkî ye?" Ger bipirsana dê bigihîştana vê encamê ku zimanê ev kurdistaniyên qal dikin ne tirkî ye.
Bi ser de jî wisa nivîsîne: "Emê felsefeya Ehmedê Xanî ji bo xwe wekî bingeh bigirin, emê li ser rêça ji Şêx Ubeydullah heta Seyîd Riza, ji wir heta roja me emê hurmeta ji bo têkoşîna wan ji bo xwe bingeh bigirin"***
Ê heyrana çavên we, wele me nebihîstiye Ehmedê Xanî felsefeya xwe li ser tirkî saz kiriye. Ger tiştek wisa hebe ji me re bibêjin em jî hîn bibin.
Yan ne, qet nebe hurmetê nîşanî Ehmedê Xaniyê ku di kurdî de israr kiriye ji wir derxin.
Mînak 3:
Me got devê kî vedibe qala pîroziya kurdî dike ne? Lê binêrin ez îstatîstîkek bidim we:
Di van salên dawî de we qet bihîstiye malpereke xwerû bi kurdî vebûye? Li Bakur û li parçeyên din malperên xwerû bi kurdî her ku diçin kêm dibin. Hindik mane. Û di van salên dawî de li Amedê, Sêrtê, Mêrdînê û bajarên din çi malper bi navê "NEWS" vebûne hemû yan temam3i bi tirkî ne, yan jî ji bo xapandinê 'Kurdî-tirkî' nivîsandiye, sedî yek (hûn dixwazin bibêjin sedî sê, xem nîn e) kurdî ye.
Ka kî qîmetê dide kurdî?
Û her kî ku devê xwe vedike rexne li siyasetmedarên kurd (ez qala yên DBP-HDP'ê dikim) çima kurdî bikar naynin... Ka pêşî tu bikar bîne, dûre ji yên din bixwaze.
Ka wekî din ezê rebim çi bibêjim. Em tenê dikarin bibêjin: Xwedê tirkiya we zelaltir û xurtir bike.
*Ji ber derdê min ne kes e, feresat e, her wiha ez ne dixwazim reklama wî ne jî yê weşanê bikim loma nav bikar naynim.
**Dubare bibêjim naxwazim nav bidim. Malperek bi tirkî weşanê bike ez çima reklama wê bikim.
***Min ji tirkî wergerand, dibe şaşî wergera min de hebe, lê sedî sed fikir ev e.
.jpg)
.jpg)
