ez zarok im
cezayekî giran im
xwe nadim xwedê
Gotinên
hîn pê li mayînên deng nekirine, dibêjin:
“Zorbayeke êşiyayî ye edebiyata bindestiyê – li goristana metnên êşiyayî û zorba, çavên xwendinê zû bi zû li qerekterên zindî rast nayên.”
Gotinên
hîn ji devê min nefiriyane û nebûne fuzeyên hîpersonîk di sînga vê nivîsê de, dibêjin:
“Barbariyeke êşiyayî ye edebiyata kedî. Kovîbûna xwe nadim nava lepên wê. Wekî Enkîdo şûr nakişînim li şevê. Mirina xwe nakim kevirê qorzîkê – te dî ew ê qewîn dike dîwarê nemirtiya xwedayên xezebê û tirsê.”
Gotinên
hîn ji ezmanê zimên nexwiricîne û ev rûpel nekirine galaksî, dibêjin:
“Ji sînorê hişê kurdan wê de, misqalek çirûsk zikê tariyê diçirîne. Ji sînorê hişê kurdan vir de, misqalek tarî zikê ronahiyê diçirîne.”
Gotinên
hîn li rexê deryaya şerabê, li ser şezlonga zimanê min dirêjkirî, dibêjin:
“Em ê dev ji vê konfora bêdengiya serxweşîyê bernedin û nebin xizmetkarên deng
wekî
demançeya lûleya wê li ser cenîka Hîtler diêşiya
wekî
birîna hesin a tilîkek dîktator ew dikola
wekî
hêrsa peyvên di bêkêriya destê şairê xwe de diteqiyan
wekî
dirêşa aşiqê serxwebûna sexte ya di birîna eşqê de li azadiya tirsonek digeriya
wekî
qêrîna dawî ya ji devê birînê dirijiya ser rûyê jêçûna ebedî û edebî
wekî
zîla têlefona newekbûna di kefa destê wekbûna xwe de diziriya
wekî
wekî a bi dizî li ser mirina wekbûna xwe digiriya
Piştî defaktoya millî kirasê angaje ji rihê xwe dike, qedera vê nivîsê ji nû ve dest pê dike:
wekî
min van gotinên absurd nenivîsîbe, di hundirê serê xwe de min berî dabe wê dinyaya hîn hêmayekê ew kifş nekiriye û bibezim
wekî
beza berî dabe tirsa xwe
wekî
bombeyek ji balafira hebûnê hatibim avêtin, di zikê tirsa xwe de biteqim. Çavên min bi ser dinyaya hîn nehatiye kifşkirin de bên girtin û gotinên şil ji devê min biniqitin:
wekî
li havîna deryaya Med, li ber siya ala rengîn ya di destê serxwebûnê de li ba dibe, melekeke di rengê berfê de ji asoya vê nivîsê dakeve, bi lêvên xwe hêmayên şîn li ser rûpelê lêvên min lêbike
û
zarokên welatê min helbesta eşqa azadiyê û azadiya eşqê ji hev re bixwînin…
.jpg)
.jpg)
