Desteya Rêveber a TEV-DEM’ê destnîşan kir ku PDK/ENKS û AKP/MÎT li ser dijminantiya li Rojava civiyane, hinek kom anîne cem hev û serkêşiya wan jî sîxurên Tirkiyeyê dikin. Desteyê ev yek wekî "helwesteke provokatîf û rezîlane" binav kir. 

Desteya Rêveber a Tevgera Civaka Demokratîk (TEV-DEM) derbarê civîna li dijî Şoreşa Rojava li bajarê Rihayê pêk hatî, daxuyaniyeke nivîskî weşand û got: “PDK ji bo pûçkirina şoreşa Rojava her tiştî dike, lê gelê kurd vê ji bîr nake û dê vê bêyomiyê pûç bike.”

Desteyê eşkere kir ku kesê bi navê Abdulazîz Temo pêşengiya vê civînê dike û got: “Ev kesên ku serkêşiya vê civînê dikin, ji berê ve sîxurtiya Komara Tirkiyeyê dikin û destê wan di şehadeta gelek ewladên gelê kurd ên wekî Şehîd Xebat Dêrik de heye. Pêşengiya van kesan ji bo civîneke wiha, nîşan dide ku ev civîn wê xizmetê ji planên qirêj re bike. Ev kes bi awayekî rûşûştî û bi bêexlaqî xwe wekî berdevk û îradeya şoreşa Rojava nîşan didin, ev yek helwesteke provokatîf û rezîlane ye.”

‘Divê gelên me hişyar bin’

Desteyê da zanîn van kesan bi rêxistinkirina Tirkiyê û PDK´ê civîn li dar xistiye û wiha dewam kir: “Ev kesên ku tevlî vê civînê dibin di heman demê de piştgiriya êrîşên li dijî Şêxmeqsûdê jî dikin. Ji ber vê, kesên tevlî civînê dibin li hemberî gelê kurd bi qasî AKP’ê û heta zêdetir sûcdar û gunehkar in. ENKS û PDK ku bi MÎT û desthilatiya AKP’ê re tê bibîranîn, nîşan dide ku ev ketine nava hewldaneke çawa ya qirêj û bêyom.”

Desteya Rêveber a TEV-DEM’ê daxuyaniya xwe wiha bi dawî kir: “Her çiqas ev kes di nava helwesteke bi lanet de bin jî, em ê berpirsyariya xwe ya dîrokî, avakirina Federasyona Demokratîk a Bakurê Sûriyeyê û têkoşîna xwe bi biryardariyeke mezin dewam bikin. Gelên me li hemberî vê rûreşiyê divê hişyar bin û bi pêşxistina tifaqa xwe, vê bêyomiyê pûç bikin." 
Temo: PYD taşeron e

Di vê navberê de Temo ji bo ajansa dewleta Tirkiyeyê "AA"yê axiviye û gotiye, "Niha PYD wekî taşeron kar dike. Kî çi bixwaze, çi qas bide ew wisa, wekî taşeronek kar dike. Kî pere bide PKK ew jî fermanê dide PYD'ê û ciwanên me dimirin. Lewma divê kurdên Sûriyê bêne perwerdekirin û zanakirin."