Berlîn
Karîkaturên Mîchele Rech ê ji Îtalyayê (Zerocalcare), ku qala berxwedana Kobanî dikin, bi zimanê almanî jî hatin çapkirin.

Karîkaturîstê Îtalyayî Mîchele Rech (Zerocalcare), ku di dema êrîşa çeteyên DAIŞ'ê ya dijî Kobanî de çû Pirsûsê û destek da berxwedanê, li ser berxwedana Kobanî karîkatur xêz kir. Ev karîkaturên Zerocalcare, bi zimanê almanî jî hatin çapkirin.
Pirtûka wî ku bi navê “Kobane Callîng” (Kobanî bang dike)" hat çapkirin mîna rêze fîlmekî li ser berxwedana Kobanî ye.
Michele Rech di xêzan de navê xwe yê "Zerocalcare" bikar tîne jixwe li ser berga pirtûk jî ev nav heye. Ew di heman demê de nivîskarê blogê ye û 34 salî. Zerocalcare li Îtalyayê yek ji karîkaturîstên navdar ê siyasî ye.

Zerocalcare demek li ser sînorê Bakur-Rojavayê Kurdistanê ma û li vê derê dest bi xêzkirina karîkaturên li ser Kobanî kir. Beşek ji van karîkaturan, di nava 2 salên borî de li kovara heftane ya Îtalyayê "Internazional"ê hatin weşandin. Ji ber ku van karîkaturan gelekî bal kişandin, li gel weşandina di kovarê de her wiha wekî pirtûkek hatin çapkirin.

Pirtûka ku di kurtedemê de çapa wê xilas bû, gelek carên din hat çapkirin. Her wiha karîkaturîst Zerocalcare pereyên ji pirtûkê hatin bi destxistin ji bo ji nû ve avakirina Kobanî şandin.
Zerocalcare, bi 8 hezar Euro ku ji karîkaturên xwe bi dest xistibû, ûltrasonofiyek kirî û radestî nexweşxaneya biçûk a li Kobanî kir.

Pirtûka bi navê “Kobanê bang dike” piştî Îtalyayê li Almanyayê jî gihîşt ber destên xwendevanên xwe. Pirtûka ku ji 272 rûpelan pêk tê, ji aliyê Weşanxaneya Avante ya li Berlînê ve hat çapkirin.
Di pirtûkê de mirov dikare gelek aliyên berxwedana Kobanî bibîne.

Kesên bixwazin pirtûkê bikirin dikarin ji ser vê navnîşanê bikirin:
http://www.avant-verlag.de/comic/kobane_calling