Diyarname

Serokê Klûba Amed Sporê Metin Klavuz got: "Kayûmê dest danî otobusa serwîsa lîstikvanan."

Tîma Amed Sporê ya fûtbolê îsal ne di nav rewşek baş de ye. Li ser rewşa tîmê û tiştên diqewimin Serokê Klûba Amed Sporê Metîn Kilavuz ji MA'yê ji bo Lezgîn Akdenîz axiviye. Vane ji nûçeyê hin gotinên Kilavuz:

- Cihê ku em dixwazin em ne lê ne. Em vê dizanin, bi hemû hêza xwe em dikin ku bersiva vê yekê bidin.

- Ji bo rexneyan em amade ne, lê ji bo trollan na. Ji kerema xwe re guh nedin trollan. Ji bo rexne û pêşniyaran em amade ne lê emê guh nedin trollan. Emê destûr nedin kesên heqaretê li tîma me dikin.

- Di hemû maçên me de wekî ku maça tîma neteweyiye dijî me derdikevin. Herî dawî li Konyayê 120 deqe Merşa Merterê lêdane. Tiştên ku têne kirin dijî rihê sporê ye.

Amed Spor tîma gel e

- Amed Spor tîmeke girêdayî nirxên gel e. Em tîmek in ku em aştî û nirxên gerdûnî yên ku divê di nav sporê de hebin em diparêzin. Amed Spor berendamê xelata fair-play e.

- Bi hatina kayûmê re me transfer dan sekinandin. Hêza me tune. Hêza aborî tune. Em wekî rêveberî bi çavkaniyên heyî encax em karin vê bikin.

- Hevşaredarê Bajêr sedî 60 dengan digire lê hûn kayûmê dişînin. Mirov yê hilbijêrî bigire û yên tayînkirî bişîne cihê wî ev yek ne li gor demokrasî û hiqûqê ye.

Walîtî destûr neda em kampanyayê saz bikin

- Kayûm çawa hat dest danî ser otobusên serwîsê yên lîstikvanên me ku ew otobus şaredarî ji bo me terxan kiribû. Dema lîstikvanê me di otobusê de bûn dest danîn ser. Ew lîstikvanên zarokên vî bajarî ne. Tşitek wisa dibe? 

- Walîtiya Amedê destûr neda em kampanyaya alîkariyê bidin dest pê kirin. Li Tirkyeyê tîmên navçeyan jî têde hemû tîman alîkariya SMS dan dest pê kirin. Lê li Amedê destûr nedan me. Hûn dizanin piraniya klûban komele ne û walî destûrê didin ji bo sazkirina kampanyayê lê li Tirkiyeyê tekane klûba destûr nedane Amed Spor e. Çima? Tu sedem û daxuyanî nîn e.

Lîstikvanekî kurd ji ber tirsê nehat Amedê

- Di dema transferê de ji ber zorlêkirina wan gelek lîstikvan nehatin. Ez nav nadim lê min ligel forvetekî kurd axivî, di heqê transferê de jî me li hev kir, tam dema me fermiyek saz dikir ev lîstikvan di heman lîgê de çû tîmek din. Me yê 80 hezar TL bidana, bi buhayek ji vê erzantir çû.

- Salane butçeya me 8 mîlyon TL ye. Hatinên îddîa û hatinên ji federasyonê hene. Hatinên ji îddîayê ji bo prîma lîstikvanan tê xerckirin. Ji bo lêçûyînên din divê em derfetan saz bikin lê vê demê ji ber rêveberiya herêmî nîn e em rastî gelek pirsgirêkan tên.

- Ger Amed Spor îro hê jî heye Amed Spor deyndarê rêveberên berê ye. Ez îdîa dikim tiştên anîne ser Amed Sporê ger bianiya ser tîmek din ew tîm îro dê bihata girtin. Pirgsirêkên malî di her warî de li pêşiya me asteng e.

- Di nîveka lîgê de li gor derfetên me emê ji bo hin cihan transferan çêbikin.

- Di serdema 2012-2013'yan de bi ser hev de 15 maç bi dest xistin û em bûn şampiyon. Me rekora Beşîktaşê şikand. Ne zehmet e em vê serketinê dubare bikin. Em pirsgirêkên fînansê, pirsgirêkên lêanînê çareser bikin dê Amed Spor bigihîje play-offê.