Diyarname

Li Iraqê ji sala 2003’yan ve posta Serokomarî di destê kurdan de ye ku qest ew e ku PDK û YNK’ê ne. Ji ber ku YNK û PDK’ê li hev nekir û her yekê berendamekî nîşan dan îro jî ji bo Serokomariya Iraqê kes nehat hilbijartin.

YNK’ê Serokomarê niha Berhem Salih, PDK’ê jî li ser navê xwe Rêber Ehmed wekî berendam nîşan dabû. Ev demek e her civîna ji bo hilbijartina serokomarî tê bi paş ve xistin. Îro li Parlemena Iraqê civîn hebû. Ji bo lidarketina civînê divê 220 mebûs amadebana lê ji ber ku ew qas mebûs ne amadebûn civîn taloq bû. Vê carê biryar hat girtin ku roja çarşemê carek din parlemen ji bo vê yekê li hev bicive.

Ji bo posta Serokomarî YNK’ê ji serî de Salih carek din wekî berendam nîşan dabûn. PDK’ê jî Hoşyar Zebarî nîşan dabû lê dadgehê berendamtiya wî ji ber dozek betal kiribû. Dûre PDK’ê biryar da ku Rêber Ehmedî wekî berendam nîşan bide. Ji bo ku Ehmed bi ser bikeve PDK çû ligel sunî û ligel tevgera Sad li hev kir ku navê "Rizgarkirina Welat” li vê eniyê danîn. Lê dîsa jî hejmara dengên wan ji bo civandina parlemenê û hilbijartina serokomarî têrê nekir. Li aliyê din hejmara mebûsên YNK’ê û yên ku pitgirî didin Salih jî têrê nake. Ji bo ku aliyek bi ser bikeve 30 mebûsên serbixwe yên li Parlemena Iraqê divê li aliyek cih bigirin.

Çarşemî dê çawa be ji niha de ne diyar e, lê wisa diyar e her du alî jî ji ya xwe nayên xwarê.

Li aliyê din Serokomarê Iraqê Berhem Salih ji bo çareserkirina qeyrana siyasî banga diyalogê li hemû aliyan kir. 

***

Nûçeyên eleqedar:

- PDK’ê kesekî din ji bo Serokomariya Iraqê wekî berendam nîşan da 

- Dadgehê berendamtiya Hoşyar Zebarî betal kir

- YNK dîsa Berhem Salihî wekî berendam nîşan dide