Cemil Oguz

Li welatek bifikirin. Nav ne girîng e. Bila kesek bê desthilatdariyê. Ew, ji bo desthilatdariya xwe xurtir bike, ji bo bibe hakimê her derê û her tiştî dê çi bike? Bersiv li gor welatan diguhere lê ji bo welatên ne demokratîk herhal dê bersiv çi pêdivî pê hebe dê wê bike ye. Serokdewletê Rusyayê Putin jî wisa dike.
Pêşî Yekîtiya Sovyetê têk diçe, dûre xirecir di nava Yekîtiya Rusyayê û pêre jî hemû welatên bi vê yekîtiyê ve girêdayî derdikeve. Dûre zilamek bi navê Vladimir Putin tê ser kar û her ku diçe ew cihê xwe zexmtir, xurtir dike. Putin ji bo cihê xwe xurtir bike rêxistineke ciwanan ava dike. Rêxistina bi navê Nashi bi her awayî girêdana xwe nîşanî Putin dide, carinan çalakiyan li dar dixe, carinan diçe li mirovan dixe. Û niha ev rêxistin bi ser çîroka keçek bi navê Masha re bû mijara belgefîlmekî. Belgefîlmê bi navê "Putin's Kiss' (Maçkirina Putin) di çarçoveya 31'yemîn Festîvala Fîlman a Stenbolê de du caran (5 û 10'ê mehê) hat nîşandayîn.

Belgefîlmê "Putin's Kiss" xwe bera nava dilê demokrasiya Rus ku wekî "Demokrasiya bi şêweya Putin" tê bi nav kirin dide. Di fîlm de em rêxistina ciwanan Nashi ku bi armanca vê demokrasiya Putin biparêze hatiye avakirin û em çîroka Mashaya 19 salî ku berdevkê vê rêxistinê ye temaşe dikin.

Di nav armancên rêxistinê de ji pêşî li firehbûna fikrên muxalefetê bigire, heta 'Rusyayê ji neyarên wê' paqij bike gelek tişt hene. Nasha ku berdevka vê rêxistinê ye gelek bi Putin ve girêdayî ye û wî wekî "Napolyonê Kremlînê" dibîne.

Hinek Putinî wekî zordarek, komek din wî wekî bavekî karîzmatîk, her wiha rizgarkerek dibînin.
Nasha jî yek ji wan e ku Putinî û rêveçûna Rusyayê ya di bin rêveberiya Putin de diparêze.
Belgefîlm bi ser Nasha re rewşa Nashi nîşan dide ku mirov navan biguherîne, navên welatek din jî lê bike dibe. Ji ber ku li her welatê ne demokratîk dikare "Nashi"yên wisa hebin, wisa zordarî li dor û dorê bikin.

Her wiha rola rojnamegerê ku di dawiyê de rêxistina Nashi derbên mirinê lê dide jî girîngiya rola rojnamegeran a di welatan de baş nîşan dide. Ku dema qesta mirina rojnameger dikin Nasha jî hay ji xwe çê dibe ku di nav rewşeke çawa de ye.
Bi gelek dîmenên ku ji çalakî û xebatên cur bi cur ên Nashi nîşan didin, dîsa bi girtina dÎtinên muxalefetê ku ew Nashi wekî zordar bi nav dikin belgefîlm serketîtir bûye.

Belgefîlm ji bo dîrok û rewşa welatan gelek girîng in. Ji bo serwextbûna der barê welatên ne demokratîk, welatên dîktator temaşekirina "Putin's Kiss" girîng e. Belgefîlmê ku li festîvalên Sundance û Amsterdam hatiye nîşandayîn xelata ÎDFA'yê ku li dinyayê yek ji girîngtirîn festîvala belgefîlman e girtiye, hêjayî temaşekirinê ye. Bi vî belgefîlmî û belgefîlmên bi vî rengî mirov dikare bibîne ku welatek bi ku ve diçe jî.

Kunyeya belgefîlm:
Putin's Kiss / Maçkirina Putin
Derhêner: Lise Birk Pedersen
Sala Kişandinê: 2011
Mawe: 84 deqe
Ziman: Rusî

***

Nûçeyên eleqedar:

- Şahiya sinemayê Festîvala Fîlman a Stenbolê dest pê kir

- Festîvala Stenbolê fîlmên kurdî dike mêvanên xwe

- Di Festîvalê de Dersên Sînemayê

- Dest bi firotina bilêtên fîlman kirin

- Rêwîtiya Festîvala Stenbolê dest pê kir

- Xelatgirên Rûmetê yên Festîvala Stenbolê diyar bûn

- Serokên Juriyê Ceylan û Mungan in