Diyarname
Kovara Nûbiharê bi hejmara xwe ya nû ya 164'an li pêşberî xwendevanan e. Di kovarê de hin nivîs derketine pêş ku yek ji wan jî li ser Melayê Cizîrî ye.
Kovara Nûbiharê ku 3 mehan carek derdikeve, hejmara xwe ya havînê gihand ber destên xwendevanên xwe.
Di vê hejmarê de Nevat Eminoglu bi ser navê "Melayê Cizîrî: Şairê eşq û estetîkê" nivîsek amade kiriye û li ser Cizîrî sekiniye. Eminoglu wisa dinivîse, "Mela Ehmedê Cizîrî şairekî kurd ê sedsala 16'an e. Ew şairê qesr û serayê ye. Lewma ew wekî şaîrekî serdema muqtedîr ya mîrên kurdan tê nasîn. Di şiîra wî ya lîrîk de hêmanên guh ên wekî îhtîşam, hesasiyet, xwebawerî û ciwanî derdikevin pêş."
Helbestan M. Tanrikulu (Mem Ronga) li ser "Du helbestên Sidqî Ezîzoglu", Hafini Taşkin jî berê xwe daye portreya Dengbêj Elbariyê Panosê. Yek ji nivîskarên kovarê Ayhan Geverî jî di vê hejmarê de li ser "Destana Cimcime Siltan û varyantên wê yên kurdî" sekiniye. Destana Cimcime Siltan li Rojhilata Navîn di nav gelek gelan de heye ku li nav kurdan jî varyantên wê hene. Geverî, li ser varyantên aliyê Gever, Culemêrg û Şemzînanê sekiniye.
Ji hevpeyvînan, Salihê Kevirbirî li Gurcîstanê, bi şanoger Bînbaşê Axê re hevpeyvînek kiriye û belav kiriye. Bînbaxê Axê dibêje, "Gava Sovyet hilweşiya, çand û şanoya me jî pê re hilweşiya!"
Bi nivîsên xwe Şerq Bulbulî Kerem, Mihemed Elî Elewîkeya, Sabri Akbel, Felat Dilgeş, Edîb Polat, Saîd Mîrza, Zeynep Çelik, Mîr Şad, Dawid Aram, Yilmaz Elagoz, A.R.T Dilazad, Sait Faik Abasiyanik, Fîrûzan Demir, Hekîm Meretoyar, Dr. Omer Ulucay, Nevzat Eminoglu, Nasir Kemaloglu, Hêmîn Omid, Serdar Bedirxan, W.K.Merdimîn di vê hejmarê de cih girtine.
Her wiha helbestên helbestvanên wekî Rojen Barnas, Berken Bereh, Ahmed Arif, Sidqî Azizoglu, Îmamê Şafîî, Se’diyê Şîrazî, Mascha Kalêko, M. Zahir Ertekin, Xebatkarê Şirnexî, Refîq Sabîr, Sidîq Gorîcan, Sabri Akbel, Mela ‘Ebdurrehîm Behmûrî, Muqades Agirî, Azad Rebiwar û Prof. Behcet Al hatine weşandin.
Ji bo têkilî:
0212 519 00 09
info@nubihar.com


