Amed
Şaredariya Peyasa Amedê ji bo parastin û xurtkirina ziman bernameya yekem a “Pêşbaziya Zimanê Kurdî” ya li dar xist. Di pêşbaziyê de xwendekar hatin ba hev.
Merasima destpêkirina Pêşbaziya Zanînê ya Kurdî ku ji aliyê Gerînendetiya Çand û Karên Civakî û Meclîsa Ziman yên Şaredariya Peyasê ve bi hevkariya Şanoya Bajêr a Amedê hatibû organîzekirin, ji aliyên zarokan ve eleqeyeke mezin dît. Di çalakiyê de dîmenên rengîn derketin holê.
Perwerde û kêfxweşî bi hev re
Xwendekarên Malên Zanînê yên di bin banê Gerînendetiya Çand û Karên Civakî ya Şaredariyê de xebatan dimeşîne, bi beşdariya cîgirê hevşaredaran û malbatên xwendekaran bername li dar xistin. Di çalakiyê de xwendekar tenê neketin pêşbaziyê, lê di heman demê de dest bi rêwîtiyeke çandî jî kirin. Di bernameyê de li xêzefîlma bi kurdî temaşe kirin, helbestên bi kurdî xwendin û bi mamikên kurdî hem kêf kirin û hem jî zanîna xwe bi pêş xistin.
Fînala Mezin di Pûşperê de ye
Ev pêşbazî dê her meh bi awayekî bi rêk û pêk bê lidarxistin û ji bo demeke dirêj hatiye sêwirandin û tê amadekirin. Pûanên ku xwendekaran bi dest xistine dê bên berhevkirin û di Fînala Mezin a meha pûşperê de werin zêdekirin û encam bên ragihandin.
“Em ê zimanê xwe li her warê jiyanê belav bikin”
Piştî bernameyê, Gerînendetiya Karên Civakî ya Şaredariyê daxuyanî da û got: “Ji bo ku zimanê me di jiyana civakî de bêtir xuya bibe û were parastin, xebatên bi vî rengî pir girîng in. Em ê bi van hewldanan zimanê xwe zindî bihêlin û bi nifşên nû re parve bikin. Biryardariya me ya ji bo belavkirina zimanê kurdî li her qada jiyanê dê her tim berdewam be.”