Amed
Helbestvanê navdar Ehmed Huseynî demeke dirêj bû ji ber nexweşiya penceşêrê li Swêdê dihat dermankirin, roja 10'ê adarê canê xwe ji dest dabû. Cenazeyê wî anîn Amedê, îro li ÇandAmedê merasima cenazeyê hat li dar xistin û ew şandin Rojava.

Mebûs û hevşaredarên DEM Partî, nûnerên partiyên siyasî û saziyên sivîl ên civakî, nivîskar, helbestvan, xebatkarên çand û hunerê û gelek kesên din di merasimê de amede bûn.

Cenazeyê Huseynî bi ala kesk û sor û zer xemilandin û anîn ser dikê.

Piştî deqeyek rêzgirtinê hunermend Şêrko Kanîwar helbest xwendin. Dûre sînevîzyona ku qala jiyana Ehmed Huseynî dikir hate nîşandayîn.

Dûre gelek kesan li ser Ehmed Huseynî gotinên xwe gotin. Va ne çend gotin:

- Hevşaredarê Bajarê Mezin ê Amedê Dogan Hatûn: Bi rastî jî em karin bêjin ne xatirxwestinek e, her tim ew ê li axa Kurdistanê di hemû dilê kurdan de zindî bimîne. Bi rastî jî zû bû. Mafê wî hebû ku Kurdistaneke azad jî bibîne. 

- Hevberdevka Komîsyona Ziman, Çand û Hûnerê ya DEM Partiyê Cemîle Tuhalli: Ehmed Huseynî ne tenê kesayetekî qenc, helbestvan û nivîskarek bû; ew di heman demê de welatparêzekî qedirbilind bû. Ehmed Huseynî helbestên xwe her tim bi hestên ji bo welatê xwe bi dawî dikirin. Tu dê her di dilê me de bî. 

- Hevberdevkê Însiyatîfa Yekîtiya Demokratîk Mehmet Kamaç: Jiyana xwe xal bi xal, roj bi roj; hestên xwe, nêrînên xwe, zanîstiya xwe bi pênûsa xwe, bi hestên xwe di dilê me da nivîsandiye. Em bawer in; ev tiştên wiha, ev berhemên wî wê di dîroka kurdan a dirêj de cihê xwe bigirin. Ji bo berxwedana gelê kurd wê bibe ronahiya rêya wan.

- Hevseroka PEN'a Kurd Rojbîn Perîşan: Bêguman îro em mamosteyekî mezin, rewşenbîrekî helbesta kurdî bi rê dikin. Ew bi qasî axa xwe qedîm, bi êş û berxwedaniya jiyana xwe ya serbilindî xatir dixwaze. Ji ber ku ew pêşengê helbesta kurdî ya modern bû, wî rêyek û şêwazekî nû li ber helbest û wêjeya kurdî vekir û em hemû bi xwendina wê rêkê mezin bûn. Mîrate û mîrasiya wî, dê di emanetê hemû nivîskar, wêjevan û helbestvanên kurd de be.

- Endamê Enstituya Kurdî ya Amedê nivîskar Feratê Dengizî: Bi rêzdarî û xemgîniyeke mezin bejna xwe li ber hozanê mezin Ehmed Huseynî ditewînim. Di dilê min de em dikarin wisa bibêjin; Şêxê min, pîrê min, oxir be hevalo, oxir be. Em têne dilê helbesta te. Em têne wê banga te ya yekîtiyê. Em têne wî dilê te yê ku qet naraweste. 

- Endama Komaleya Wêjekarên Kurd Mîna Acer: Wekî Komeleya Wêjekarên Kurd, em di vê roja reş de sersaxiyê didin malbata wî, gelê kurd û hemû nivîskar û helbestvanan. Ehmed Huseynî bi her rist û pirtûka xwe zimanê me xemiland; bi kûrahiya felsefeya xwe û bi sêwirandina hunera xwe, asoyên nû li ber wêjeya me vekir. Mîrateya ku wî li pey xwe hiştiye, ji bo me deryayeke bêbin e.

- Seroka KASED'ê Salîha Ayata: Ehmed Huseynî her tim yekîtî û axa Kurdistanê diparastin, di dilê wî de cihê Amedê cuda bû. Ehmed Huseynî bi helbestên xwe, bi hostatî û hunera xwe, heqîqeta gotinê û gotina heqîqetê wekî mîrateyek hişt û çû. Helbestvan ji bo neteweyekê yek ji stûnên herî sereke yên ziman e. Huseynî jî ji bo kurdî kesekî wiha bû. 

- Serokê Weqfa Mala Haco Zîwer Haco: Em îro li vir, li paytexta dilan, pêşwaziya cesedê pak ê helbestvanê mezin, dengê Amûdê û dengê rûmeta Rojava, Ehmed Huseynî dikin. Îro li vir ne tenê wekî şahidê koça dawî ya helbestvanekî mezin im, lê wekî hevalekî ku bi salan li sirgûnê, li axa Swêdê, bi Ehmed re nan û xwê parve kiriye me. Ehmed her dem digot: ‘Ez ê rojekê vegerim, lê ez naxwazim bibim mêvan, ez dixwazim bibim ax.’ Ew mînaka deryayekê bû, her dem tijî pêlên xeyalan û her dem dilsojê zimanê dayikê bû. Ew li Swêdê tenê nedijiya; wî Kurdistan di dilê xwe de her roj ava dikir.

- Nivîskar û rojnameger Rizoyê Xerzî: Ehmed Huseynî heta kêliya dawiya jiyana xwe, mirovekî dilsoz, xwedî biryar, ronakbîrekî zîrek û girêdayî şîn û şahiya gelê xwe bû. Di hemû helbest û nivîsên xwe de, her dem li kêleka yekîtiyê bû. Tu caran rê neda dubendî û dijminahiya alîgiriya korane. Ehmed Huseynî, kedeke mezin ji bo avakirina Hevgirtina Rewşenbîrên Rojavayê Kurdistanê da. Di kêliya herî bêhêvî de, dema ku ez li Ehmed digeriyam, dîsa hêviyên mezin dida min, hêviya vegerekê dida min.

Piştî axaftinan cenaze birin morga Goristana Yenîkoya Baglara Amedê. Sibê wê bi ser Deriyê Sêmalka re cenazeyê bişînin Rojava û li Amûdê wê defin bikin.

****

Têbiniya Diyarnameyê:
Ji bo yên nizanin helbestvan Ehmed Huseynî roja 10'ê adarê mir. Va ye nûçe û nivîsên eleqedar ên vê demê:

- Bernameya merasima cenazeyê Ehmed Huseynî ya li Amedê diyar bû

- Çend Têbinî Li ser Xatirxwestina Şêxê Helbesta Kurdî Ehmed Huseynî
- Şair Ehmed Huseynî merd
- Em ê çawa vê birînê bi hev bidin nasîn û vê xewnê şîrove bikin
- Li Amedê ji bo Ehmed Huseynî şîn datînin

Parve Bike