Ez nizanim çi bêjim, lê ez vê dizanim: Ez ne teorîsyen im. Û tiştên li vir ez binivîsim dê hinek not bin. De a bi xer.
Hilbijartineke derbas bû û me gelek tişt li dû xwe hiştin. Ji aliyê kurdan (qesta min HDP û Yeşîl Sol Partî ne) ve min hin not girtin û dixwazim parve bikim.
RÊYA SÊYEMÎN
Di 10 salên dawî de ev hereketa kurd meseleya Rêya 3'yemîn derxistibû pêş. Vê rêyê rastî û heta asteke serketin jî nîşan dabû. Di vê hilbijartinê de ev rê hat terkirin, loma jî bû sedema kêmasiyan (ez nabêjim têkçûn). Wisa xuya ye rêya sêyemin biparasta dê hinek din serketin bihata bi dest xistin.
ZIMANÊ PROPAGANDAYÊ
Di hilbijartinê de zimanê propagandaya HDP-YSP'ê ne zimanekî hêviyê bû. Vî zimanî ne xîtabî mejiyê kurdan, ne xîtabî dilê kurdan kir. Peyva "Gelan" ne li gor kurdan bû. Ji bo kurdan stratejiya kurdî, mafên kurdan, hebûna kurdan, vegotina rastiyan wan muhîm bû, lê bi têra xwe ev yek xwe nîşan neda.
Ji bilî vê di zimanê propagandayê de peyv, gotin, meylên ku derketin holê û di bîra me de mabe çi ye? Tu tişt. Tiştê lazim e ji bo me ev e.
DAXWAZÊN KURDAN
Hilbijartin ew e ku partî li gor daxwazên hilbijêrên xwe tevdigere. Divê HDP-YSP jî li gor yên xwe tevbigere. Baş e. Di vê hilbjartinê de HDP-YSP'ê çi li gor daxwaza kurdan anî ziman? Çi li gor wan daxwaz kir? Piştî hilbijartinê çi di bîra me de ma? Hema bêje qet. Ma ne hewce ye her daxwazên me bêne ziman?
Xalek din, baş e bi kurdî propagandaya xwe kirin an bi zimanê biyanî? Ma ev jî pirs e.
Erê, pirs e. Daxwaza kurdan ew e ku partî siyaseta xwe bi zimanê gelê xwe bike. Erê çend berendamên wan hebûn bi kurdî kar dikirin, lê di nav golek de tenê çend dilop bû. Ma ne tiştê divê em van dilopan zêdetir bikin...
LÎSTEYA BERENDAMAN, DANÎNA SINDOQAN
Vê tevgerê carinan ji gel tiştin pirsîne, lê piranî navendê biryar daye. Vê carê jî wisa çêbû. Ev rast bû? Na. Madem em demokrasiyê dixwazin ma ne divê peşî em li nava xwe demokrat bin? Ha, ev heye: Navend dikare kontenjanek bo xwe saz bike, mesela sedî 5-10 û sedî 90-95'ê din ê lîsteyê biryarê bo gel bihêle. Mesela çima li Amedê, Batmanê, Wanê sindoq neyên danîn û berendam neyên hilbijartin? Paşê ji nav wan lîsteya berendaman bê amadekirin...
ÎTÎFAQA KURDAN, ÎTÎFAQA TIRKAN
Ligel Îtîfaqa Ked û Azadiyê îtîfaqek rast bû, lê YSP di vir de xwedî însiyatîf tevnegeriya. Her kesî dizanî TÎP bi serê xwe bikeve hilbijartinê dê zirarê bide berendamên YSP'ê û îtîfaqê. Îstatîstîkan jî ev yek nîşan dida. Lê dîsa jî ji bo TÎP'ê bi tolerans tevgeriyan. Divê dest li maseyê bidana û bigota yan hero, yan mero. Li hemberî TÎP'ê helwesteke zelal nîn bû, yên dij derdiketin jî, yên şirikatiya ligel wê diparastin hebûn. Hilbijêran nizanî çi bêje, çi bike. Dem bi van nîqaşan borî. Dema ku ji bo hilbijartinê, ji bo xebatê bê xerckirin ji bo vê nîqaşa tu fêdeya kurdan têde nîn bû hat xerckirin.
Li aliyê din îtîfaqa ligel partiyên kurdan hat çêkirin. îtîfaqeke girîng bû, lê yek, gelek dereng hat ragihandin, didu, bi têra xwe qîmet nedanê û derneket pêş. Helbet ev îtîfaq ne tiştek rojane ye, ne ji bo vê hilbijartinê tenê ye jî, loma jî hêja ye, hê zêdetir qîmetê heq dike. Û van her du îtîfaqan nîşanî me dan ku meseleya îtîfaqan meseleyeke gelek girîng e û di dema pêşiya me de carek din li ser bê axivîn, xet û polîtikaya wê bê zelaltirkirin.
BERÎ MEHEK DEST PÊ KIRIN
YSP'ê sedî 15-20 ji bo xwe kiribû hedef. Wekî mebûs jî 100. Erê, hedefeke maqûl bû, hedefeke baş bû jî. Lê çi kir? Mehek ji bo hilbijartinê mabû dest bi xebatê kirin. Halbûkî reqibê wan ê mezin şeş meh, salek berê de dest pê kiribû. Binêrin, reqibê wan êvara ku bi ser ket di cih de ferman da partiya xwe ku ji bo hilbijartina 2024'an bixebitin. Hê 10 meh mane, lê ji niha de dest pê kirine. Ê me çi dikin? 30 roj berê dest pê dikin. Wisa be, helbet dê negihîjin hedefê.
REWŞA CIWAN-JINAN
Li nav tevgerê cihê jinan girîng e. Bi ya min heta asteke jin dixebitin jî. Helbet kêmasiyên wan jî hene, lê em wan didin aliyek û berê xwe didin ciwanan. Li nav tevgerek/partiyek ciwan xurt nebin ew tevger/partî nikare bi ser bikeve. Baş e, ciwanên HDP'ê/YSP'ê çi dikin? Nizanim. Lê vê dizanim: Ciwanên HDP'ê rabûn daxuyanî dan, "Emê xwe bigihînin 7 mîlyon ciwanî" (Ajansa Mezopotamya). Xwe gihandin? Na. Ê, çi slogan e? Çi bû bi van 7 mîlyon ciwanan? Kar bi slogonan dibe? Na. Rastî ev e ku veguherîneke ji bo meclisa ciwanan jî lazim e. Ciwan nebin partî nikare li ser lingan bimîne.
KILIÇDAROGLU
Di meseleya piştgiriya Kiliçdaroglu de, ez têdigihîjim, fêm dikim, lê dîsa jî dilek dibêje, "xwezî berendamê/a xwe derxista". Dest ji xweziyê jî berde, jixwe "Rêya 3'yemîn" hebû. Dest ji vê rêyê berdan. Rê bû averê û zirar giha destkeftiyan. Ji bilî vê, di nav partiyê de, di nav propagandayê de ev mesele baş nehat zelalkirin. Di her mîtîngê de navê Kiliçdaroglu li pêş bû. Ji bo kesên zana ne problem bû, lê serê gelekan tevlihev bû. Ev yek bû sedem CHP li heremê gelek dengan jî bigire. Ev ne zelalî gelek zirar da, dê bide jî.
NÎQAŞA SERDEMA NÛ
Di vê serdema nû de helbet dê gelek nîqaş çêbin. Ji nû ve sazkirineke jî dê çêbe. Îhtîmal heye konferans/kongreyên nû bêne sazkirin û nîqaş bêne kirin. Eşkere ye, pêdivî bi nîqaşê heye. Pêdivî bi diyarkirina serdema nû jî heye. Çi bê kirin jî divê di kurtedemê de bê kirin, ji ber ku li pêş hilbijartineke nû heye. Berî vê jî desthilatdarî dê rê nede we ku hûn nefesê bigirin. Loma jî pêdvî bi têkoşîneke nû heye. Pêdivî bi zimanekî nû yê têkoşînê heye. Demeke giran û zehmet li pêş vê tevgerê ye. Ji bo vê jî plansaziya nû divê. Ew plan gere li gor parçeyan, li gor bajaran, navçe û gundan cuda cuda be. Mînak li Licê û Geverê daxwaz cuda ye, lê li taxeke Stenbolê, li taxeke Muglayê daxwaza kurdan cuda ye.
Niha HDP-YSP bi vê hilbijartinê hejiyan. Ger bi ser xwe de neyên hê zêdetir dê bihejin û hê zêdetir bi paş ve dê herin. Jixwe plan û daxwata desthilatdarî jî ev e.
MÎNAKA JI 2004'AN VE ŞAREDARÊN AMEDÊ
Dema em van dibêjin, helbet em vê meseleyê ji bîr nakin: Di van 6-7 salên dawî de bi hezaran HDP'yî ji berendaman heta serokê wan, gelek hatin girtin. Dewletê ji yên jêr, heta mejiyê HDP'ê, hêzek mezin xist hundir. Hinek ji qan jî sirgûn kirin.
Ji bo em zehmetiya di vê hilbijartinê de fêm bikin, em mînakek wisa bidin: Hevşaredarên Amedê yên ku ji 2004'an ve heta niha hatine hilbijartin yek jî ne li derve ye; Hin girtî, hin sirgûn... Yekî jî nekarî di vê hilbijartinê de kar bike. Di rewşeke wisa de HDP-Yeşîl Sol Partî ket hilbijartinê.
Aliyê desthilatdariyê her tişt bo xwe bikar anîn. Berî hilbijartinê hinek wezîrên dewletê ji bo hilbijartin adil derbas bibe îstîfa dikin. Di dîroka Tirkiyeyê de yekemîn car wezîran îstîfa nekir û wisa hilbijartin bi bêedaletî li dar ket. Em van tiştan hemûyan dizanin. Em zehmetiyên li pêşiya HDP-YSP'ê dizanin. Em dikarin bibêjin ligel ew qas zehmetiyan li ser lingan mayîna tevgerek girîn e û li ser lingan mayîn jî serketin e. Ev jî rast e. Lê kurdan ev nîşan daye: Tu rast tev bigerî, çi dibe bila bibe ez te li ser lingan digirim. Loma jî em dibêjin xetayên hatine kirin nehatana kirin dê rewş hinek din li gor îstatîstîkan û li gor dil ba.
Nivîs gelek dirêj bû. Belkî carek din em notên din jî parve bikin.
.jpg)
.jpg)
