Dadgeha Eyaleta ya Kopenhagê, îro danê sibê lîsansa weşanên hemû kanalên televîzyonê yên kargeha Mezopotamya Brodcasting, betal kir. Dadgehê her wiha cezayê pereyê 5 mîlyon Kronê Danîmarkayê (2 mîlyon Euro) li kargehê birî. Dadgehê bi vê biryara xwe di dîroka çapemeniya Danîmarkayê de mora xwe avêt binê rewşeke nû. Bi vê yekê re cara yekemîn e di dîroka welêt de cezayekî ew qas giran ê pereyan li kargeheke çapemeniyê tê birrîn.

Mafê dijderketina li biryarê heye. Lê ji bo îtiraz bê kirin, divê cezayê pereyê 5 mîlyon Kron bê dayîn an jî temînatek bê nîşandan. Eger di nava du hefteyan de îtîraz neyê kirin, wê lîsansên MMC, NÛÇE TV û ROJ TV betal bibin.

Nûçegihan Amed Dîcle der heqê rewşê de agahî da û diyar kir ku gavên wê ji niha û pê ve bavêjin wê parêzerên wan diyar bike û got, "Eger di nava du hefteyan de îtîraz neyê kirin, wê weşanên televîzyonên me rawestin."

Amed Dîcle da xuyakirin ku dozger xwestiye kargeh bi temamî bê girtin û got: "Dadgehê jî bi cezayê ew çend giran ê pere re, di rastiyê de biryara dozgeriyê erê kiriye."

Dîcle ragihand ku biryara mijara gotinê, ji biryara sala 2012'yan girantir e û anî ziman ku ev demeke hesabên Mezopotamya Bordcasting hatine rawestandin û astengiyên cihê hatine derxistin. Dîcle anî ziman ku cezayê pere yê hatiye birîn, di rewşa niha de di asta duyemîn de girîng e û got, "Niha lîsansa weşana me hat betalkrin. Divê di nava du hefteyan de îtîraz bê kirin û di heman demê de cezayê pere were dayîn." Dîcle da xuyakirin ku eger kargeh karibe cezayê pere bide, wê weşanên televîzyonan dewam bikin, lê di rewşeke berovajî de wê weşan qut bibin.

Dîcle da xuyakirin ku dadgehê di biryara xwe de cihekî berfireh daye asta heyî ya çareseriya pirsgirêka kurd û destnîşan kiriye ku pêvajo erênî ye. Dîcle anî ziman, ku yekem car e li Danîmarkayê cezayekî ew qas giran ê pereyan li saziyeke çapemeniyê tê birîn.

Rojnameger Ferda Çetîn jî, ku di rûniştina dozê de amade bû diyar kir ku ev biryar bi hevkariya dadgeriyên tirk û Danîmarkayê hatiye dayîn û got: "Berî rûniştina dozê Sefîrê Bilind ê Tirk ê li Kopenhagê û rayedarên Sefaretxaneya Bilind, bi dozger û dadgerên li dozê dinêrin, di nava samîmiyetek mezin de tevdigeriyan."

Çetin ragihand ku li gorî agahiyên wan ji parêzeran girtiye, mafê îtîraza li vê biryarê 15 rojan e, lê dibe ku bêyî li benda 15 rojan bê rawestîn, dadgeriya Danîmarkayê dikare di her kêliyê de weşanên televîzyonan rawestîne.

ANF