Amed
Komeleya Nivîskarên Kurd diyar kir ku girtina Hemîd Dilbihar nêzikatiya ziman û çanda kurd nîşan dide û xwest bilez Dilbahar bê berdan.

Komeleya Nivîskarên Kurd, bi mebesta şermezarkirina girtina nivîskar Hemîd Dilbiharê ku ji ber axaftina xwe ya mitînga Êlihê ya di çarçoveya qampanyaya "Êdî Bes e Em Perwerdehiya Bi Zimanê Xwe Dixwazin" a ji aliyê TZPKurdî ve hatibû lidarxistin, de hatibû girtin, li ber AZC Plazayê ya Amedê daxuyaniyek da çapemeniyê.
Daxuyanî ji aliyê helbestvan Arjen Arî ve hate xwendin. Arî diyar kir ku nêzîkbûyîna li hemberî Dilbihar, nêzîkatiya tunekirina kurdî nîşan dide. Arî anî ziman ku divê dewletên nûjen ziman, çand û baweriyên cuda biparêze û wiha got: "Dibe ku Komara Tirkiyeyê li ser yek al, yek ziman û yek neteweyê hatibe avakirin, lê ev yeke maf na de ku ew ziman, çand, û baweriyên cuda ji holê rake."

'Divê gelê kurd ziman û çanda xwe bi avayekî azad bijî'

Arî anî ziman ku zimanê kurdî ji holê rakirinê re rû bi rû ye û wiha domand: "Di cihanê de gelo kîjan netew wekî kurdan nikarê ziman û çanda xwe bijî û çanda wî ji aliyê dewletê ve tê astengkirin? Di nava civaka cîhanê de hin gel hene ku qasî navçeyek kurdan in, lê ji aliyê Neteweyên Yekbûyî (NY) ve tên nasîn û tên parastin. Divê gelê kurd jî mîna gelên din bikaribe ziman û çanda xwe bi awayekî azad bijî." Arîn destnîşan kir ku di çarçoveya qampanyaya zimanê zikmakî de gelek zar, jin û kalên kurdan derketine qadan û got ku ji ber ku Dilbahar di mitîngek wiha de axaftiye hatiye girtin.

Bang li nivîskarên kurd hate kirin

Arî got ku li Tirkiyeyê mafên mirovan, mafên axaftinê û azadiya ramanê tune ye û wiha berdewam kir: "Dilbihar ji ber ku mîna her nivîskarekî ramanên xwe aniye ziman hatiye girtin. Em wekî Komeleya Nivîskarên Kurd bangawaziyê li rayedarên dewletê dikin ku bila bilez helbestvan û nivîskar Hemîd Dilbihar bê berdan û ji gelê xwedî vî zimanî jî lêborînê bixwazin."
Arî, her wiha bang li PEN'a Navneteweyî, PEN'a kurd, PEN'a Tirk, Sendîqeya Nivîskaran ya Tirkiyeyê, Sendîqeya Nivîskarên Kurd, yekîtiyên nivîskaran yên Dihok, Hewlêr, Kerkûk û Silêmaniyê kir ku piştgiriyê bidin Dilbihar.
Piştî daxuyaniyê Arî ji aliyê polîsan ve hate binçavkirin.

Ji DÎHA'yê hatiye girtin