ŞIRNEX (DÎHA)

Li taxa Sûrê ya navçeya Cizîrê ya Şirnexê hat diyar kirin ku di bodrûmekê de gelek kes di êrîşa bi tankan de hatin qetilkirin. Hevseroka HDP'ê ya navçeya Mîlasê ya berê Derya Koç a ku di avahiyê de ye wiha got: "Nêzîkî saetek berê êrîş kirin û 20 hevalên me bi şewitandinê qetil kirin. Em 20 kesên birîndar mane û dibe ku em jî bêne qetilkirin. Li derdora me ne." 

Li taxa Sûrê ya navçeya Cizîrê ya Şirnexê ji avahiyeke nû agahiyên qetilkirinê hatin. Di avahiyekê gelek kesên sivîl çend saet berê bi êrîşan hatin qetilkirin. Ji birîndarên di avahiyê de Hevseroka HDP'ê ya navçeya Mîlasê ya berê Derya Koç, derbarê rewşê de agahî dan. 

'Li derdora me ne dibe ku me qetil bikin'

Ji ber ku derdora wan hatiye dorpêçkirin Koç axaftina xwe kin birî û wiha got, "Niha rewşa me pir xedar e. Di jêrzemîna qatê jêrîn de nêzî 20 hevalên me yên birîndar qetilkirin. Em niha 20 kesên birîndar mane. Derdora me hatiye dorpêçkirin. Niha êrîşî me dikin. Dibe ku em jî bêne şewitandin. Ji bo vê divê bi lez û bez gel berê xwe bide vir. Bes em 20 kesên birîndar mane û li taxa Sûrê ne. Derdora me bi tankan hatiye dorpêçkirin. Şebeke tune. Dibe ku telefonên me jî bêne girtin. Divê ez niha telefonê bigirim. Li derdora me ne."

Piştî demekê dîsa bi telefonê agahî hat girtin û Koç vê carê wisa got: "Bi topan êrîşê aliyê ku em lê ne dikin; dîwan êdî hildiweşin û em di bin xirbeyê de mane. Polîsan dîsa gaza çavsotîner avêt, em bi zorê nefesê digirin."

Koç ku bi zorê diaxivî diyar kir ku birîndarên ku şewitîne rewşa wan girantir e.

Navên 20 kesên birîndar diyar e 

Navê kesên birîndar ên di avahiyê de ev in: Lokman Bîlgîç, Murat Kekîn, Sînan Kaya, Îbrahîm Îvrendî, Firat Malgaz, Orhan Tunç, Meryem Akyol, Mursel Dalmiş, Star Ozturk, Murat Tunç, Abdulselam Turgut, Fatma Demîr, Emel Ayhan, Mesut Ozer, Abdullah Ozgur, Agît Aydin, Derya Koç, Bariş Gasîr, Sahîp Edîp û welatiyê bi navê Ferhat ê ku paşnava wî nehat zanîn.