Diyarname

Nûbihar ku di adara 1992'yan de dest bi weşana xwe tam 25 sal li dû xwe hiştin. Pêşî weşanxane, piştî heft mehan, yanê heman salê kovarê jî dest bi weşanê kir. Kovara ku sê mehan carek derdikeve niha bi hejmara xwe ya 138'an (hejmara zivistan 2017), di 25 saliya xwe de li hemberî xwendevanên xwe ye. Weşanxane jî di 25 salî de bi sedan pirtûkan di nav arşîva kurdî de cih girtiye.

Nûbihar 25 sal berê li alîkî weşanxane, li alîkî jî bi kovara xwe bi gelek weşanên din re dest bi weşanê kir. Heta niha kovarê cihek taybet girt di nav kovargeriya kurdî de, weşanxaneyê jî bi sedan pirtûkên bi kurdî ragihandin xwendevanên kurdî û cihek taybet girt di nav pirtûkxaneya kurdî de. Pirtûkên wêjeyê, yên li ser dîrok û ziman, yên li ser  folk, nirxandin di gelek waran de pirtûk gihandin ber destên xwendevanan.Niha hem kovarê hem weşanxaneyê arşîvek xurt saz kiriye.

Kovara Nûbiharê di vê 25 saliya xwe de hejmara xwe ya nû bi gelek nivîsên cuda ragihand xwendevanan. Bi lêkolîn, hîkaye, folklor, ceribandin, biyografî, hevpeyvîn û bi helbestên xwe naveroka jimara dawîn ya Nûbiharê hatiye dagirtin.

Di nivîsa edîtor de edîtorê kovarê Suleyman Çevîk wisa qala serdema derketina kovar û weşanxaneya Nûbiharê hatiye kirin: "Zimanê te bi salan li te heram bûye, mekteb û xwendin tune bûye, sîstema dewletê bi ruh û şexsiyeta te jî lîstiye, lêbelê dîsa tu li ser piya mayî û bi zimanekî “tuneyî” te roman, çîrok û helbest nivîsîne.

Li Tirkiyê kar û xebatên li ser kurdan di her dewrê de zehmet in.

Hetanî sala 1991'ê derxistina kovar û kitêbên kurdî qanûnen qedexe bû. Li pey rabûna vê qedexeyê bi gelek weşanên din re Nûbiharê jî dest bi weşanê kir."

Çevîk qala zehmetiyên niha kurd têre derbas dibin kiriye û wisa nivîs temam kiriye: "Ji aliyekî ve, ji her tebeqeyê însan hêvîşikestî ne û ji her tiştî sar bûne, li aliyê din jî ev însanên weşanên kurdî dişopandin çavtirsiyayî bûne û ketine endîşeya pêşeroja xwe…

Piştî qedana pêvajoya çareseriyê îro rewşa weşangeriya kurdî wiha ye… Lê em dizanin û hêvîdar in ku ev tişteke demî ye û wiha naçe. Di salên destpêka Nûbiharê de, di gelek rewşên xirab de jî me tu carî hêviya xwe wenda nekiriye û bi xêra vê hêviyê em gihîştine sala 25'an.

Jixwe em dizanin, li pey her zivistanekê biharek, li pey her şevekê jî ronahiyek heye…"

Di kovarê de Celilê Celîl li ser "Apê Ego û Serpêhatiya Nivîsîna Poêma “Têlî Hemze”" nivîsa xwe pêşkêş kiriye;  Berken Bereh jî bi sernavê  "Ya işqê kirî kavil" keda xwe xistiye nava kovarê.  Adburrahman Adak li ser "Poetîkaya Helbestên Mela Ehmedê Zinarexî", Mehmet Gultekîn jî "Berhevoka destnivîsên kurdî ya Prof. Martin Hartmann" nivîsiye.

Rohat Alakom ku bi lêkolînên xwe nivîs û portreyên balkêş pêşkêş dike di vê hejmarê de "Du Eyûb Paşayên cihê: Eyûb Paşayê Kaskî û Eyûb Paşayê Zîlanî" derxistine ber ronahiyê. Her wiha gelek nivîsên din di nav kovarê de cih girtine.

Ji bo têkilî û xwestinê:

Tel (0212) 519 00 09

E-Mail: nubihar@gmail.com