Cemil Oguz

Fûara Pirtûkan a Stenbolê îsal 36'emîn car ji aliyê TUYAP'ê ve tê li dar xistin. Fûara îsal di navbera 4-12'yê meha sermawezê de ye. Di deh salên dawî de herî hindik îsal weşanxaneyên kurdan beşdar dibin: Tenê sê çar sazî standê vedikin.
Mijara bingehîn a fûara îsal "Wêje, baş e ku tu heyî" hatiye diyarkirin. Fûarê îsal nivîskara jin Ayla Kutlu kiriye "Mêvana Rûmetê". Kutlu di sala 1938'an de li Antakyayê hatiye dinê û heta niha bi dehan pirtûkên roman, çîrok û pirtûkên zarokan weşandine. Her wiha bi van xebatên xwe gelek xelat girtin. Li ser Kutlu dê hin çalakî jî bêne lidar xistin. Her wiha hin berhemên wî kirine fîlm û kirine lîstikên şanoyê jî.

Weşanxaneyên kurdan kêm in
Wisa diyar e di van salên dawî de rewşa weşanxaneyên kurdan zêde ne baş e. Vê yekê bandor li beşdariya di fûarê de jî kiriye lewma hejmara weşanxaneyên kurdan kêm e. Di salên borî de hejmara beşdariya weşanxaneyên kurdan gihîştibû 10'î lê îsal daketiya asta herî jêr. Ji Weşanxaneyên kurdan Weşanên Avesta (No 2211 A), Weşanên Nûbihar (No 2604 E), Weşanên Aram (2105 C), Weşanên Rûpel (No 2605 C) û Weşanên Ava (No 2605) tenê dê li fûarê standê vekin. Mixabin ji weşanxaneyên kurdan îsal tenê ev hene. Mixabin ji aliyê panel û gotûbêjên bi kurdî ve jî rewş xirab e; îsal tu çalakiyeke bi kurdî ya van weşanxaneyên kurdan li fuarê nîn e.
Ji bilî van Weqfa Îsmaîl Beşîkçî (No 4111) jî standê vedike. Weşanên Evrensel ku hin pirtûkên bi kurdî jî çap dike dîsa li fûarê ye.
Bi giştî 850 weşanxane û saziyên sivîl standê vedikin ku di nav van de Weşanên Aras ku li ser ermenan pirtûkan çap dike, gelek weşanên çepgir, weşanxaneyên oldar û weşanxaneyên dewletê jî standan vedikin.
Ji saziyên sivîl Komeleya Nivîskarên Jin (No 4210), Weqfa Yekîtiya 68'yian, Hewldana 78'iyan, Weqfa Hrant Dînk, ÎKSV (Weqfa Çand û Hunerê ya Stenbolê), Komeleya Nivîskaran PEN'a Tirk jî standê vedike.

Welatê mêvan Kore
Îsal wekî welatê mêvan Kore hilbijartine. Li ser Koreyê dê gelek çalakî bêne li dan xistin, wêjeya Koreyê li Stenbolê bi her awayî bibe mêvan.
Di çarçoveya çalakiyan de jî ji gotûbêj, panel û çalakiyên zarokan heta guhdariya helbestan li dor 300 çalakî dê hebin.
Ji bilî van dê nivîskarên ji Kuba, Norwec û Almanyayê jî beşdarî fûarê bibin.

Ji ARTÎST'ê "UTOPYA"
Her wiha wekî her sal îsal jî ligel fûara pirtûkan Fûara Hunerê ya Stenbolê ARTÎST jî lidar dikeve ARTÎST îsal 27'emîn car deriyên xwe vedike û mijara wê ya bingehîn jî "Utopya" ye.

**

Nûçeya eleqedar:

- Fûara Pirtûkan a Stenbolê şikil digire