Diyarname
Li welatên paşketinê kar tune mirov têde bixebitin, nan tune mirov bixwin, berevajî vê li welatên pêşketî nîqaşa "Bila mirov hefteyê tenê çar rojan bixebitin" dest pê kiriye. Em qala Îngilistanê dikin. Li vî welatî sendîkayan ev bang kir. Ew wisa dibêjin; "Ger sermayedar karê ku bi teknolojiya pêşketî bi dest bixin ligel karkeran parve bikin, di vê sedsala em têde ne de karker hefteyê çar rojan bixebitin dê têrê bike."

Nûçe ji aliyê Nûçegîhana Aboriyê yê BBC Newsê Rebecca Wearn ve hatiye nivîsîn. Li Îngilistanê "Kongreya Sendîkayan" (TUC / Trade Union Congress) ev bang li hikumetê kiriye. Ev kongre li Îngilistan û Gallerê birêxistin e û 5.6 mîlyon karker endamên wê ne û di kongreya xwe ya salane de bang li hikumetê kir ku ji bo karker hindik bixebitin û heman pereyî bigirin bikeve nava tevgerê.
Di nav 10 salên dawî de bi pêşketina 'artificial intelligence' (di kompîturê de teoriya bikaranîna mejiyê mirovan*), teknolojiya robotan û otomasyonê dê 200 mîlyar sterlîn zêdetir kar li butçeya Îngilistanê zêde bibe. Ji ber vê yekê jî TUC dixwaze karker hindiktir kar bikin lê heman meaşê bigirin.
Niha li Gallerê karkerek çar rojan dixebite û meaşê pênc rojan digire. Li paytexta Galler Cardiffê, Sazkarê IndyCube Mark Hopper dibêje ku wan sal û nîv berê ev rewşa kar saz kiriye, lê ne hêsan e û van gotinan lê zêde dike: "Firsenda me hebû ku em çar rojan kar biken û meaşê pênc rojan bi dest bixin û ev hewldana me bi ser ket." Kompaniya ku êdî zêdetir kar dike li devreyî Gallerê jî şaxan vedike. Ji heman kompanî Russ Todd jî wisa gotiye: "Dema li ber kar dimîne ez ligel malbata xwe derbas dikim. Bavê min gelek demên dirêj dixebitiya. Berî ez şiyar bibim ji mal derdiket û piştî ez radizam dihat mal. Tiştek muhîm e ku mirov ligel malbata xwe be."
Di nûçeyên de gelek agahiyên din jî hatine belavkirin. Vane hin agahiyên ji nûçeyê:
- Li gor TUC'ê li welat mîlyon û 4 sed hezar kes hefteyê heft roj kar dikin.
- Li gor anketê sedî 51 endamên saziyê gotine ku pêşketina teknolojiyê ne ji bo berjewendiya karkeran dê ji bo berjewendiya hîssedaran bê bikaranîn.
- Saziya bi navê Centre for Cities gotiye ku li Îngilistanê heta sala 2030 dê 3.6 mîlyon kar ji aliyê makîneyan ve b^ekirin.
- Sekreterê Giştî yê TUC'ê France O'Grady gotiye ku berê ji bo du roj bibin rojên betlaneyê û saetên kar bêne daxistin têkoşîn dihat dayîn, niha têkoşîn ew e ku rojên betlaneyên derxin 3 rojan.
- O'Grady: "Em dizanin ku hin dibêjin dê teknolojî jiyanê hê xirabtir bike û xwedî fikra reşbîn in lê teknolojî dikare ji bo armancên baş jî bê bikaranîn û bi vî awayî dikare jiyana kar a her kesî baştir bibe û ew dewlemendtir bibin."