Diyarname

Îro Roja Pirtûkan a Cîhanê ye. Bi biryara UNESCO’yê ji sala 1995’an ve ev roj tê pîrozkirin. Di vê rojê de em berê xwe bidin pirtûkên kurdî wê çawa be?

Di sala 1923’yan li Katalanê kesek bi navê Goorge gulan li keçikan belav dike. Di sala 1925’an de jî dest pê dike gulan û pirtûkan li wan belav dike. Piştî demekê ev yek li Katalanê dibe wekî şahiyekê, bi belavkirina gulan û pirtûkan şahî tê li darxistin.

UNESCO'yê jî hem li ser vê yekê hem jî 23’yê mehê ji ber ku roja mirina nivîskar William Shakespeare, Miguel de Cervantes, Inca Garcilaso de la Vega û Josep Pla ye; di heman demê de roja rojbûna Maurice Druon, Vladimir Nabokov, Manuel Mejía Vallejo û Halldór Laxness e ev wekî Roja Pirtûkan a Dinyayê qebûl kiriye.

UNESCO vê rojê diyarî xwendina pirtûkan û mafê parastina nivîskaran dike. Lewma heman roj wekî Roja Telîfê ya Dinyayê jî tê qebûlkirin.

Di vê rojê de hêviya me ew e ku kurd xwedî lê derên û pirtûkên bi kurdî bixwînin; weşangerên kurd jî xwedî lê derên û hinek din bala xwe bidin ser telîfa ji bo nivîskaran.

Bifikirin ku şaredariyên kurd pirtûkên kurdî çap bikin, saleke din di vê rojê de li ser kuçeyan bisekinin, gul û pirtûkan li mirovan belav bikin...

Û ciwan jî li hezkiriyên xwe gul û pirtûkên kurdî diyarî bikin...

Bi hêviya ku saleke din wê kurd jî vê rojê pîroz bikin; Roja Pirtûkan a Dinyayê li we pîroz be.