Cizîr
Parlementerê DEP'ê yê berê Orhan Dogan ku di encama krîza dil de jiyana xwe ji dest dabû di 3'emîn salvegera mirina xwe de li ser gora xwe hat bibîranîn.

Parlamenterê DEP'ê yê berê Orhan Dogan, di 3'emîn salvegera mirina xwe de li navçeya Cizîrê ya Şirnexê bi meşeke ku bi tevlêbûna bi hezaran kesî hat lidarxistin, hat bibîranîn.
Parlamenterê BDP'ê yê Şirnexê Hasîp Kaplan, endama MP'yê ya BDP'ê Cîhan Sîncar, Serokê BDP'ya Şirnexê Abît Îke, Şaredarê Sêrtê Selîm Sadak, Cîgirê Şaredarê Batmanê Serhat Temel, Şaredarê Şirnexê Ramazan Uysal, Cîgirê Şaredarê Cizîrê Mehmet Saçi, Şaredara Qilebanê Şukran Sîncer, Şaredarê Silopiyê Emîn Tugrul, Şaredarê Elkê Yusuf Temel û malbata Orhan Dogan jî tevî meş û bîranînê bû.

Meş li ber Navenda Çandê ya Mem û Zîn (NÇM) dest pê kir û heta ber gora Dogan dom kir, di meşê de diruşmên "Rêhevalê Rojê nemir e", "Şehîd namirin" û "Bijî Serok Apo" hatin avêtin û sirûda "Çerxa Şoreşê" hat gotin.

Piştî merasîma li goristanê li NÇM'ê ji bo Dogan bernameyek bibîranînê hat lidarxistin. Pankart û wêneyên Dogan li salona NÇM'ê hatin daliqandin. Di şevê de ji bo Dogan mewlîd hat dayîn

Parlamenterê BDP'ê Hasîp Kaplan jî di bernameyê de axaftinek kir û bal kişand ser nîqaşên di navbera MHP û AKP'ê yên di warê darvekirina Rêberê PKK'ê Abdullah Ocalan de û got, ""Di 29'ê pûşperê de Şêx Seîd hat dervekirin. Dîsa di 29'ê pûşpera 1999'an de der barê Ocalan de biryara darvekirinê hat dayîn. Ev dîrok ne bi tesadûfî ne. Êdî tu kes nikare darvekirinan pêkbîne. Ji ber ku gelê me gelek bi hêz bûye."

Piştî axaftinan zarokan ji bo Dogan helbest xwendin û Koma Sorxwîn û hunermend Seyda Perîncek jî stran gotin. Her wiha di bernameyê de sînevizyona ku der barê jiyana Dogan de hatibû amadekirin, hat pêşkeşkirin.