Diyarname

Hunermend Nûdem Durak ku girtî ye û 19 sal cezayê hepsê lê hatiye birîn 25'ê mehê ji girtigehê banga piştgiriyê kir. Rockcanê li dinyayê navdar Roger Waters ev dengê wê bi ser twittera xwe re parve kir û carek din banga berdana wê kir.

Hunermend Nûdem Durak di 22'yê avrêla 2015'an de li Şirnexê ji ber stranên kurdî hat girtin. Paşê du doz lê vekirin û di encamê de 19 sal cezayê hepsê lê birîn. 

Nûdem Durak niha li Girtîgeha Bayburtê a Tîpa M de ye û hem nexweşiya helîna hestiyan pêre dest pê kiriye, hem jî li hemberî nexweşiya Gravesê (guatra bi jehr) pêre heye. Ew li hemberî nexweşiyê ber xwe dide û di heman demê de wekî hemû girtiyan dixwaze dengê wê bê bihîstin.

BI STRANÊ BANG KIR

Nûdem Durak 25'ê mehê ligel malbata xwe bi telefonê axivî û di dawiyê de parçeyek ji strana "Çiyayên me" xwend. Durak wisa got, "Ji ber guatra bi jehr ez ditirsim. Dibe ez bênefes bimînim. Ger ez bême berdan ezê bikaribim vê nexweşiyê baş bikim, lê li vir zor e. Loma jî berî dengê xwe winda bikim dixwazim derkevim." 

Durakê bi strana ku şand bang li hunermendan ki ku bibin dengê wê û xwedî lê derên.

'EZ GÎTARA XWE BO WÊ DIBIM'

Avakarê koma Pink Floydê hunermend Roger Waters di meha avrêlê/gulanê de gotibû ku ji bo ew gîtara xwe diyarî Nûdem Durakê bike dê were Tirkiyeyê. Wî, diruşma azadî ji bo Nûdem Durakê bilind kiribû û banga berdana wê kiribû.

BI TWITTERÊ DENG DA

Hunermend Roger Watersî vê carê ev banga nû ya Nûdem Durakê û strana wê bi ser hesabê xwe yê twitterê re belav kir û got, "Nûdem Durak girtiye, bi telefonê stran bo dinyaya derve şandiye... Nûdem Durak heft sal in girtiye, ji kerema xwe re başdarî kampanyaya berdana wê bibin. Bi hezkirin."

DENGÊN JI DINYAYÊ

Li aliyê din ji ligel Rojer Watersî li dinyayê gelek kesî deng ji bo Nûdem Dûrakê derxistibû. Fîlozofê navdar Noam Chomsky gotibû, "Cezaya dane wê bêadeletî ye. Xebata wê bê şîdet û bi hunera xwe ji bo mafên kurdan ên adilane bû. Ez hêvî dikim dê bê berdan." 

Lîstikvanê navdar ê amerîkî Mark Ruffalo jî ji ser hesabê xwe re gotibû, "Ev kesa nazik û xweşik li girtîgeha tirkan e. Sûcê wê? Strîna stranan. Stranên bi kurdî distrê loma. Ji kerema xwe re alîkarî bikin." 

Nivîskarê fransiz Joseph Andras ji bo Durakê par nivîseke nivîsandibû. Li aliyê din li Îtalyayê îsal ji bo piştgiriya Nûdem Durakê konsere hat organîzekirin. Li Almanyayê pûlên ku wêneyê Durakê li ser bû hatin çapkirin.