Silava Ebdurehman

Piştî 18 salan li xurbetiyê û derve Şêx Murşid Maşûq El Xeznewî, kurê şehîd Şêx Maşûq vegeriya warê xwe û ji bo ajansa me axivî: "Di her sîstemê de erênî û neyênî hene. Lê bi saya vê projeyê ez îro li vir li ser xaka Rojava me. Berî 18 salan ziman, nasname, xewn, armanc û daxwazên me ji me hatibûn standin. Tu hebûna me li ser nexşeyê tune bû. Lê îro em li ser erdê xwe xwedî hebûn û hêz in."

El Xeznewî destnîşan kir ku tevî hebûna gelê kurd li ser xaka xwe ya dîrokî lê dîsa jî tu îtîraf bi hebûna wî li ser wê xakê tune ye.

PÊKHATINA YEKÎTIYÊ

Der barê destkeftiyên Şoreşa 19’ê Tîrmehê ya li ser bingeha serhildana 12’ê Adara 2004’an de El Xeznewî got: “Tiştê ku li ser erdê hatine pêkanîn hêviyên şêxê şehîdan Maşûq El Xeznewî bi temamî pêk neanîne. Kêmasî hene. Dema ku ev kêmasî bên çareserkirin wê demê em dikarin bibêjin ku hêviyên şêxê şêhîdan pêk hatin. Tiştê ku hîn nehatine pêkanîn yekbûna tevgera siyasî ya kurdî ye. Dema ku ew jî pêk bê em dikarin bibêjin ku hêviyên tevahî şehîdan pêk hatin.”

'BI NAVÊ OLÊ MAFÊN ME JI ME GIRTIN' 

El Xeznewî bang li gelê herêmê kir ku ji komployên li dijî xwe yên bi navê olê hişyar bin û got: “Wan bi navê olê nasname û mafên me standin, fîtne di nav birayan de derxistin, mal û xaniyên me talan kirin. Ol pîroz û girîng e lê belê pêwîst e em ji wan hişyar bin ên ku olê li dijî xak, bira û neteweya me bi kar tînin."

ANHA