Diyarname
Derhêner Emin Alpar li Festîvala Berlînayê "Xelata Hirça Zîvîn" girt û di axaftina xwe de got, "Berxwedana li Îranê, filistîniyên li Xezayê di nav mercên dijwar de dijîn hûn ne bitenê ne. Li Rojava û li Rojhilata Navîn kurdên hema beje esrekê ne ji bo mafên xwe têdikoşin hûn ne bi tenê ne. Û gelê min tu ne bi tenê yî. Hevalên min, Çigdem ku çar sal e girtî ye. Tayfun, Can û Mine. Osman Kavalayê heşt sal in girtî ye. Selahattin Demirtaşê neh sal in girtî ye. Ekrem Îmamoglu û hemû şaredarên din ku niha girtî ne. Û bi mîlyonan kesên deng dane wan. Hûn ne bi tenê ne. Hûnê bi tenê neminin."
Vê êvarê li 76'emîn Festîva Fîlman a Berlînê Berlînaleyê merasima xelatdayînê hebû. Derhêner Wim Wenders serokatiya juriyê dikir. Juriyê fîlmên serketî diyar kirin.
Derhêner Emin Alper bi fîlmê xwe "Kurtuluş" li festîvalê di Beşa Pêşbaziya Sereke de bû. Fîlmî Xelata Mezin a Juriyê Hirça Zîvîn girt. Alper ji bo girtina xelatê derket ser dikê û got, "Fîlmê me der barê kesên sûcên mezin kirine de ye. Di temamê kişandina fîlm de min kur ku wan fêm bikim. Di heman demê de min kir ku kesên li jiyanê mane fêm bikim. Ez li ser wan gelek fikirîm û yek ji tiştê ez hîn bûm jî ev bû: Cureya tenêtiya herî mezin dema mirov êşê dikişine bi tenê be. Dema hûn mafên xwe roj bi roj ji dest didin, bi guleyên ku bi baca we hatine girtin li we didin, dema we wekî mirov jî nahesibînin û bombeyan bi ser we de dibarînin, di wan kêliyan de hûn bi temamî bi tenê ne. Dema hûn dibinin kes we tiştekî nahesibîne û li ser we nafikire, hûn însanên herî bi tenê yên dinyayê ne. Loma jî tiştê li vê derê em bikin em vê bêdengiyê xira bikin û em bibîra wan bixin ku ew ne bi tenê ne." Alper piştî van gotinan ew nav rêz kirin û gotin "Hûn ne bi tenê ne."
Her wiha derhêner Alperî sipasiya Berlînaleyê û endamên juriyê jî kir û got, "Ev xelat ji bo min rûmeteke mezin e. Ez bipasiya sazkarên xwe, lîstikvanên xwe yên harikulade, hemû koma me û sipasiya kesên piştgirî daye vî fîlmî dikim."
Li aliyê din di festîvalê de derhêner îlker Çatak jî bi fîlmê xwe "Sari Zarflar" di beşa pêşbaziyê de bû. Çatak xelata mezin "Xelata Hirça Zêrîn" girt. Çatak jî dema xelat girt got Wenders yek ji mamosteyên min e û got, "Tiştek gelek balkêş e ez vê xelatê ji destê te digirim."
Xelatên din jî bi vî rengî hatin belavkirin:
- Xelata Taybet a Juriyê Hirça Zîvîn: "Queen at Sea"/ Derhêner Lance Hammer.
- Xelata Hirça Zîvîn a Derhênerê Serketî: Derhêner Grant Gee (bi fîlmê "Everybody Digs Bill Evans").
- Xelata Lîstikvana Serketî: Sandra Huller (bi rola di fîlmê Rose de)
- Xelata Lîstikvana Duyemîn: Anna Calder-Marshall û Tom Courtenay (bi rola di fîlmê Queen at Sea de)
- Xelata Senaryoya Serketî: Genevieve Dulude-de Celles (fîlmê Nina Roza)
- Belgefîlmê Herî Serketî: “If Pigeons Turned to Gold”, derhêner Pepa Lubojacki
- Ji bo belgefîlm Xelata Mansiyonê: “Tutu” derhêner Sam Pollard;
“Sometimes I Imagine Them All at a Party” derhêner Daniela Magnani Huller
- Kurtefîlmê Herî Serketî, Xelata Hirça Zêrîn: “Someday a Child”, derhêner Marie-Rose Osta
- Kurtefîlmê Herî Serketî, Xelata Hirça Zîvîn: “A Woman’s Place is Everywhere”, derhêner Fanny Texier
Derhêner Îlker Çatak bi fîlmê xwe "Sari Zarflar" bi ser ket./ Foto Ebrahim Noroozi / AP Photo/
Derhêner Emîn Alper bi fîlmê xwe "Kurtuluş" xelat girt./ Foto: Christoph Soeder / dpa /
**
"Kurtuluş"
Fîlmê derhêner Alper ê bi navê "Kurtuluş" li navbera Batman û Mêrdînê derbas dibe. Fîlm pevçûna di navbera eşîra Hazeran ku cerdevan in û eşîra Beraziyan ku piştî salan vedigerin gundê xwe yê ku ji mecbûrî berê koçkiribûn. Fîlm li gundê Kirkat a Batmanê û Killît a Mêrdînê derbas dibe.
Di fîlm de piranî lîstikvanên kurd dilîzin. Caner Cindoruk, Berkay Ateş, Feyyaz Duman, Naz Goktan, Ozlem Taş, Eren Demir, Selim Akgul, Hichi Demi û Nazmi Karaman serlîstikvanên fîlm in.
**
"Sarı Zarflar"
Di fîlmê derhêner Çatak "Sari Zarflar" de lîstikvan
Ozgu Namal, Tansu Biçer, İpek Bilgin û Leyla Smyrna dilîzin. Derya û Azîz ku malbateke hunermend in û li Enqereyê dijîn piştî promiyera lîstika nû bûyer bi ser wan de tên. Ew kar û mala xwe ji dest didin, ligel keça xwe Ezgî ya 13 salî koçî Stenbolê dikin.
***
Nûçeya Eleqedar:
- Fîlmên Berlînaleyê eşkere bûn
**
KANALA YOUTUBE YA DIYARNAMEYÊ
