Diyarname
Duyemîn belgefîlmê Cemil Oguz ê bi navê "Mazgal" di çarçoveya "6'emîn Rojên Belgefîlman a Egeyê" de li Zanîngeha Egeyê hat nîşandayîn. Temaşevanan eleqeyeke baş nîşanî belgefîlm dan û piştî nîşandayînê bi derhêner sohbetek li dar ket.

Rojên Belgefîlman a Egeyê ji aliyê Civaka Ragihandinê ya Egeyê ve di bin rêberiya Cîgr Doç. Hilmi Maktav de ev sala 6'an e tê lidar xistin. Rojên Belgefîlman a Egeyê ku li nava Zanîngeha Egeyê li Kampusa Sînemayê li dar dikeve her sal zêdetir balê dikişîne. Îsal bi ser 20 belgefîlmî de belgefîlm hatin nîşandayîn. Yek ji wan jî Mazgal bû ku bi beşdariya derhêner Cemil Oguz jî li dar ket.
Mazgal li ser 10 girtiyên kurd ku di 24'ê rezbera 1996'an de li Girtîgeha Amedê bi lêdanê hatin kuştin hatiye sazkirin. Temaşevanan eleqeyeke baş nîşanî belgefîlm dan û piştî belgefîlm bi derhêner re sohbetek hat li dar xistin.
Her wiha Rojên Belgefîlman a Egeyê bi nîşandayîna belgefîlma Dîlek Gokçen ê bi navê "Bûka Baranê" bi dawî bû. Piştî nîşandayîna "Bûka Baranê" bi beşdariya derhêner Dîlek Gokçen û nivîskarê senaryoyê yê belgefîlm Îrfan Aktan gotûbêjek li dar ket. Eleqeyeke baş ji bo nîşandayîn û sohbeta li ser Bûka Baranê hebû. Rojên Belgefîlman bi awayekî serketî bi dawî bû û heta saleke din xatir xwest.

Foto: Burcu Guner