DÊRIK

Li dijî xendekên li navbera Başûr û Rojavayê Kurdistanê tên kolandin, bi hezaran kesên ji Kantona Cizîrê îro li ser sînor çalakiya protestoyî pêk anîn. Çalakgeran li qadê tu al hilnedan, bi bêrên di destê xwe de ax avêtin nav xendek û dest bi nobedê kirin. Çalakgeran ji bo nobedê 10 kon vedan.

Li gel baranê jî, bi hezaran kes ji Hesekê, Serêkaniyê, Dirbêsiyê, Amûdê, Qamişlo, Tirbespiyê û Girkê Legê bi hezaran kes ketin ser rêya Dêrikê. Rojavayî xendekên tên kolandin û bersiva pêşmergeyan a bi dijwarî li nerazîbûnên demokratîk ên li hemberî van xendekan, protesto dikin.

Yên li nêzî xeta sînor bi peya, yên dûr jî bi konvoyê ketin ser rêya qada çalakiyê. Dowîzên bi nivîsa "Xwîn yek e, can yek e xiyanet neke" û "Kurdistan yek e, perçe neke" yên di destê çalakgerên li navenda bajarê Dêrikê bal kişandin.

Bi hezaran kesên li gundê Xana Serê ya 7 km dûrî Dêrikê gihaştin hev, danê nîvro ji vê derê bi konvoyê ket ser rêya Gundê Girê Sor ê li ser sînor. Girê Sor li cihê xendek lê tê kolandin e. Li pêşberî wê jî gundê Sihêla yê li Başûrê Kurdistanê heye. Xendek di navbera her du gundan de tên kolandin.

BÊ AL HATIN

Nûçegîhanê ANF'ê yê li qadê ragihandin ku çalakger saet li dora 12:40'î bi bêr û konên li gel xwe, hatin cihê çalakiyê. Nûçegîhan ku li aliyê Başûrê Kurdistanê hejmara pêşmergeyan a li xeta xendek hatiye zêdekirin, çekên giran hatine bicihkirin û du kon hatine vedan. 

Balkêş bû ku girseya gel tu al bi xwe re neanî. Çalakgeran bi vê yekê re peyam dan, ku berevajî îdîaya medya PDK'ê, nerazîbûna li xendekan ne nerazîbûna partiyekê (PYD) ye, nerazîbûna gelê Rojava ye. Di çalakiya li ser banga Însiyatîfa Gel a Rojava hat lidarxistin de, li gorî dema herêmê saet li dora 13:30 Rêveberiya Kantona Cizîrê daxuyaniyek da çapemeniyê.

BI BÊRAN AX AVÊTIN NAVA XENDEK

Di dema dayîna daxuyaniyê ji bo çapemeniyê de Wezîrê Parastinê Abdulkerîm Sarûxan, alîkarê wî yê Suryanî Heblehed Gewriye, Serokê Meclîsa Qanûnsaz Mûhammed Abbas û Endamê Dîwana Meclîsa Qanûnsaz Abdulkerîm Feko amade bûn. Wezîrê Parastinê Sarûxan daxuyanî da û got, "Di vê pêvajoya hesas de di şûna ku birayên me alîkariyê bidin me de, polîtîkayên dijber dimeşînin." Wezîr got, "Diviyabû (Rêveberiya Hewlêrê) nebûya aliyekî ambaroya li ser Rojava. Em weke Wezareta Parastinê ya Kantona Cizîrê, ji bo rakirina vê ambargoyê emê hemû derfetên xwe bikar bînin."

Dûre çalakiyên bêr pê re hebûn bi bêran, yên bêr nebûn bi kulman bi awayekî sembolîk ax avêtin nava xendekê û hewl dan dagirin. Li aliyê din ê xendek jî pêşmerge bi çoyên di destê xwe de radiwestiyan.

10 KON HATIN VEDAN

Piştî çalakiya du saetan a li ser sînor girseya gel belav bû. Hat ragihandin ku komeke ji zêdeyî 100 kesan wê li qadê nobedê bigire. Bi vê armancê 10 kon hatin vedan. Hat hînbûn ku her roj ji bajarekî herêma Cizîrê wê komek çalakiya nobedê dewir bigire.