AMED 

Berendamê Xelata Nobelê ya Wêjeyê Abdullah Peşêw bi helbestên xwe bû mêvanê amediyan. Pêşev û helbestên wî rastî eleqeyek mezin hat.

Berendamê Xelata Nobelê ya Wêjeyê Abdullah Peşêv li Navenda Çanda Ciwanan a Cegerxwîn bû mêvanê amediyan û helbestên xwe xwendin. Peşêw, ji aliyê Pen a Kurd ve ji bo Xelata Nobelê ya Wêjeyê wekî namzet hatibû nîşandan. Ligel sedan helbesthezan, Serokê Pena Kurd Şehmus Sefer, nivîskar Îrfan Babaoğlu, nivîskarê navdar ê Başûr Bedirxan Sindî, diplomat Evdal Nûrî, endamên KURDÎ-DER'ê û KCD'ê, Hevşaredarê Peyasê Memet Alî Aydin gelek nivîskar û rewşenbîrên kurd beşdarî bernameyê bûn.

Di bernameyê de ji Zanîngeha Amerîkayê a Iraqê, Marîe Labrosse helbestên Peşêw ên ku xwe wergerandibû bi zimanê ingilîzî xwendin. Labrosse jî da zanîn ku kurdî xwedî dewlemendiyek mezin e û ew kêfxweş bûye ku helbestên Peşêw wergerandine. 

Dema Peşêw derket li ser dikê temaşevanan bi çepikên xwe eleqeyek mezin nîşanî wî dan. Peşêw, di destpêkê de spasiyên xwe pêşkêşî kesên ked dane bernameyê û got ku divê nivîskarên Başûr zêdetir werin herêmê û parvekirin zêdetir bibin. 

Piştî bernameyê Peşêw pirtûkên xwe ji bo xwendevanên xwe îmze kirin.