Pîrek ya zî mêrde, qet muhîm nîyo, kam zêde kede bido û keda cê/cay serkewte bo hurmet vîneno/a. La ma ene nişte de verê xo bidê dinya de 4 pîrekanê serkewteyan.
Jacinda Ardern
Jacinda Ardern Serokwezîra Zelandaya Newî ya. Serra 1980’an de Hamilton de hamiya dinya. Ardern serra 2017’an de wexto bi koalîsyon hukmat viraşt û bî Serokwezîra Zelandaya Newe 31 serrî bî. Partîya ci 46 kursî girotîbî. Emsar, 17’ê aşma 10. de reyna Zelandaya Newî de weçînayîş bîbî û partîya ci Partîya Karkeran 120 kursî (sera 46) girote û tena serê xo bî desthilatdar. Eno 24 serrî yo ke Zelandaya Newî bi koalîsyonan raver şona, la Arderne dewran bedelna.
Partî demê xo yê desthilatdarî de qeybî şarî xebetîya, welatê xo raver berde, demê pandemî de zî bî welato ke ci de tewr tay merdimî mirenê û hetê aborî de zî rewşa înan baş a. Şarê Zelandaya Newî bi reyanê zêde xelate da Arderne.
Kovara Time ke her serre lîsteya “Dinya de 100 Tenê bi Bandor” virazena, Jacinda Arden zî kerde miyanê lîseya xo ya serra 2019an.
Sanna Marin
Sanna Marin Serokwezîra Fînlandîya ya. Serra 1985’an de Helsînkî de hamiya dinya. A 10’ê aşma 12. ya 2019’an de biya Serokwezîra welatî. Miyanê welatî de şar ayra hes keno. Marin bi ciwaniyey xo, bi kar û xebatanê xo zî yena heskerdiş. Emsar 23 û 24’ê aşma 8. de kongreya partîya ci Partîya Sosyal Demokratan virazîya. Kongre de Marine zî xeber da û vat; “Ma vîzyonêk virazê ke Fînlandîya senî biba wayirê xebatêk baş. Ma sero xebetîyenê ke saetanê xebate 8 saetan ra bifînê 6 saetan.”
Dinyaya ke zehf welatan de demê xebate 8 saetîyo, zehf welatanê bînan de 8 saetan zêdetir merdimî xebetênê de a vana ma demê xebate bifînê 6 saetan. Ma ene game qeymî dinya zehf başe niya? Ger beşkê ana bikerê go qeybî dinya zî nêbe nimûne?
Angela Merkel
Angela Merkel Serokwezîra Almanya ya, bi vatişê înan Şansolye ya. A serra 1954’an de hamiya dinya. Merkel zî qeybî ene joy miya meymanê ma: 22’ê aşma 11. ya emsarî de, yanê aşmêk verî bî 15 serrî ke Şansolye ya. Enî 15 serran de aye welatê xo raver berd. Aborî welatê xo raver berde. Butçeya înan ya serra 2019’in zêde veciya. Demê pandemî de miyanê welatanê Ewropa de Almanya, bî welata ke eşka baş xover bida û zehf zirar nêvîna. Pîrekêke 15 serrî qeybî welatêke pîl zey Almanya şansolyetî kena û serkewte ya. Bi ene joy heq kena ke tîya ca bigîra.
Gulten Kişanak
Û Gulten Kişanake. Meymana ma ya peyîne Gultan Kişanake ya. Kişanake serra 1961’in de Elezîz de hamiya dinya. Wextê Derbeya 12’ê Êlone de binê îşkencî de xover da ya. Rojnameyanê kurdan Yenî Ulke, Ozgur Gundem de kar kerda. Dimara serra 2007’in de Amed ra biya mebûse. Serra 2009’in de tewrê Selahattin Demîrtaşî biyê Hemserekê BDP’yî. Serra 2011’in de nawey Sêrt ra biya mebûse û serra 2014’in de a û Firat Anli biyê Hemşaredarê Bajarê Pîlî yê Amedî. Kişanake wexto ke hemşaredare bî va, “Batman de petrol yeno vetiş, la perey petrolî qeybî herême nîno xebetnayiş. Çi rê? Ma barey xo enî petrolî ra wazenê.” Û dewlete va etiya ez biryar dana û a eşte heps. Erê hema zî heps de wa la giraniya ci zî nêbena vinî.
Ardene Sereka Partîya Karkeran a, Marin Sereka Partîya Sosyal Demokratan a, Merkel ciwanî xo de miyanê çepgiran de xebetiya wa, Kişanake zî wayîrê fikrê çepîtiya. Eno het ro fikrê înan zî kunê serê yew xetî.Erê, mimkûn o weko bîn zî pîrekê serkewte bibê, la ma miyanê înan ra 4 pîrekê serkewteyan weçîna. Îdare bikerê. Ma hêvî bikerin go hûmara pîrekanê serkewteya biba zehf û go dinya bi înan bixemeliya.
Ene nişte di rojnameya Xwebûne de hamiya neşrkerdin.
.jpg)
.jpg)
